“Su Ministèriu de is Finàntzias non tenet idea de comunicare a s’Ufìtziu de is Doganas de Casteddu su chi bisòngiat pro autorizare a sa Saras de bèndere su carburante iscontados!”. A ddu nàrrere, pro mèdiu de su profilu Face book cosa sua, est su portaboghe e fundadore de su movimentu Terra Lìbera Giuseppe Marini, unu de is prus mannos sustenidores in Ogiastra de sa Zona Franca. “Duncas – sighit Marini – como dipendet petzi dae nois a sollitzitare a in antis de custas eletziones maladitas!”. Su capu Terra Lìbera diat a èssere dispostu finas a ghiare una manifestatzione de a su mancu 2500 persones (10 pro ogna comuna chi at espressadu su parre a favore pro sa Zona Franca) pro cumbìnchere a Cappellacci de comunicare a sa Saras de incumentzare a donare sa benzina sena de is famadas atzisas, sena derramas doganales e sena de s’Iva, pròpiu comente a su chi aiant fatu in Badde de Aosta tempus faghet.
