Mèrcuris 29 de freàrgiu in su teatru Santu Frantziscu de Tortolì ddoe est istada una serada dedicada a sa poesia e a totus is amantiosos suos e finas a cussos chi cun sa poesia traballant. Difatis in ocasione de su Fèstival Internatzionale de sa Poesia, peri su pùblicu ogiastrinu at chèrfiu fàghere sa parte sua. Sa serada est istada aparitzada dae sa poeta Seconda Carta e presentada dae s’atore e regista Ghironi.
S’adòbiu est istadu dedicadu a su grandu poeta mortu, originàriu de El Salvador, Roque Dalton. Issu, poeta e giornalista, est istadu ochidu pro more de is ideas polìticas suas e segundu su pensu de is organizadores, “rapresentat bene s’ispìritu de su Fèstival: sa literadura chi si mudat in messàgiu, in sacrifìtziu pro is àteros e in cussèntzia”.
In su palcu poetas e iscritores de fama ant fatu a mudas cun is poetas novìtzios. Tra totus regordamus su contributu de Margherita Musella, Claudia Fois, Virginia Murru, Daniela Melis, Natalina Mulas, Michelangelo Caggiano, Giuseppe Marini, Emanuele Tortorelli, Sebastiano Pili, Simone Selenu, Veronica Blu e Pina Meridda.
Poderosa meda sa poesia intonada dae Virginia Murru e Daniela Melis (dedicada a su fragellu de is abusos conta a is minores) e su cumponimentu de Seconda Carta intituladu “Cantas bortas, fèmina” (Quante volte, donna) retzitadu dae sa boghe de Tiziana Murino, giòvana atritze ogiastrina de bonas promissas. In su fèstival non sunt mancados riferimentos a s’atualidade, comente is versos dedicados dae Giuseppe Marini a Rossella Urru.
A istagiare una letura dae s’àtera ddoe fiat sa bona mùsica de sa cantante nostrana Stefania Sistu chi at fatu bìvere a su pùblicu bellos momentos de emotzione. A is ispetadores est pràghidu meda finas s’esibitzione a duos de su trumbiteri Riccardo Pittau e de s’atritze Antonella Puddu. Su resurtadu de sa serada est istadu bonu meda. Seconda Carta at naradu: “so cuntenta de àere bidu totu custa partetzipatzione dae parte de su pùblicu ogiastrinu. Isperamus de ddu pòdere torrare a fàghere cantu prima: su tretu chi benit donadu a s’arte poètica no est mai bastante!”.
