Grandu festa in su Golgo, in Baunei, s’ùrtimu coa de chida de su mese de làmpadas, in onore de Santu Pedru. Medas turistas ant leadu parte a sa sagra de sa cabra coghinende sa petza a orrostu in su Supramonte de Baunei. Sa festa est istada aparitzada dae su comitadu “Fedales de su 1960” pro mantènnere sa promissa fata pro sa lòmpida de is 50 annos in su 2010. Totu sa bidda, is pastores, is giòvanos, is amigos, òmines e fèminas, ant agiudadu a fàghère sa manifestatzione, abbrontende sa petza e servende su màndigu in is mesas ammaniadas pròpiu a dae in anti de sa Crèsia de Santu Pedru.
Is betzos de Baunei ant contadu a is turistas s’istòria de Santu Pedru in Golgo e de comente si faghiat sa festa cando issos fiant giòvanos: de cando sa petza si coghinaiat in su forru a linna a probe de sa crèsia, de is cumbessias, is domiteddas de pedra chi allogiaiant a is pastores chi passaiant sa note de sa festa in Golgo. (Gosi comente nos ant naradu Vincenzo Pusole in paris cun sa pubidda, chi ant giai coladu 80 annos ma sunt galu de retentiva e de bella presèntzia). Turistas e bisitadores ant bisitadu sa crèsia e ant pòdidu bìdere su Crutzifissu pretziosu iscolpidu in su tzinnèberu. Sa festa at sighidu cun su pràngiu a petza de cabra e binu sardu e posca cun s’esibitzione de su grupu folk de Baunei e de su Cuncordu a Tenore de Orgòsolo. Sa festa s’est concruida domìnigu a mangianu cun sa professone e cun sa missa.
