Is ùrtimas iscuadras a calare in campu in sa 14a Giorronada de su Campionadu de Sèrie A, ant èssere su Casteddu e sa Sampdòria.
Is sardos ant a bòllere torrare a bìnchere a pustis de sa partida paregiada in Lecce.
Una partida iscomunigada in ue sunt istados iscualificados su portieri Robin Olsen – pro bator partidas- e su tertzinu Fabrizio Cacciatore – pro una giorronada- .
A giogare a su postu issoro: in porta su brasilianu Rafael e in difesa – de seguru- Pancrazio Paolo Faragò.
Pro su restu sa formatzione de Rolando Maran no at a cambiare dae s’ùrtima partida.
Is meres de domo ant a giogare in su Sant’Elia contra sa Sampdoria de s’ex allenadore Claudio Ranieri, galu regordadu cun istima dae is tifosos sardos.
Sa Sampdoria dae cando est arribadu s’allenadore romanu a su postu de Eusebio Di Francesco at torradu a fàghere medas puntos. S’iscuadra est dae bartor partidas chi non perdet, mancari Fabio Quagliarella – su capucannoneri de s’annu passadu – siat dae meda sena fàghere goal.
Su Casteddu bolet lòmpere a dòighi partidas bìnchidas de fila de pare, pro iscrìere s’istòria. Difatis in s’annu de s’iscudetu de su ‘69/’70 s’iscuadra de Gigi Riva, allenada dae Manlio Scopigno, fiat arribada a ùndighi vitòrias de sighidu.
Radja Nainggolan – votadu comente mègius giogadore de Sèrie A in su mese de onniasantu – e is cumpàngios suos, ant a chircare de bìnchere a ònnia còstitu.
Custu pro abarrare in is primos postos de sa classìfica pro sighire a fàghere sonnare is tifosos de su Casteddu.