Unu milione de euros dae sa Regione Sardigna po sa formassione de assistentes de bolu.

Sa regione Sardigna at approadu una leze chi no tenet cabidianos in sa bista natzionale, istantziande unu milione de euros po agguantare sa formassione de sos zovanos sardos chi cherent divennere assistentes de bolu. Est un’operassione nova, chi cheret favoressere s’intrada a unu tribagliu chi si est isparghinde e a favoressere su tribagliu de sos zovanos in d’unu campu fintzas a commo escluidu dae sos caminos de formatzione agguantados dae sa Regione.

In custu momentu, in Sardigna no esistint iscolas o sotziedades de formassione chi potant dare s’attestadu chi serbit po faghere sa proffessione de assistente de bolu, su tzertificadu de idoneidade chi prevedint sas lezes natzionales e de s’Europa. Custu custringhet sos candidados sardo a si movere in sas regiones de su tzentru-nord po podere partetzipare a sos cursos chi sunt reconnoschidos. Propriu po custu motivu, sa Regione at detzisu de partetzipare in manera deretta, poninde a disposta titulos de intrada a sa formassione finantziada, chi ant a coperrere no solu su pretziu de sos cursos, ma puru sas ispesas po pappare, drommire e de sos viazos.

S’initziativa, approada dae sa Giunta regionale sighinde sa proposta de s’assessoradu a su tribagliu, est unu primu passu po amplariare s’offerta formativa de sa Regione po sas proffessiones novas. S’intentu est cussu de offerrere opportunidades beras a sos zovanos de un’edade dae sos 18 a sos 35 annos, favoressende s’insertu insoro in su mercadu de su tribagliu po mesu de caminos ispecializzados, cualifficantes e in linia cun sas dimandas de custu tempus de su sistema de sa produssione.

Sa carradura aerea, in manera particulare si cunfirmat unu campu istrategicu po s’isviluppu de s’accolomia, cun possibilidades de creschida custante in sos annos imbenientes. Secundu sos datos chi ant dadu sas printzipales organissasiones internatzionales de su campu, su numeru de sos passezzeris diat podere doppiare intro de su 2030.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Ozzastra terra de istoria: sos printzipales sitos archeologicos de bisitare intre nuraghes,biddas antigas e monumentos de sa tzivilidade nuragica.

S’Ozzastra est una de sas zuras de sa Sardigna prus riccas de istoria antiga. In cust’iscrocca si agattant sitos archeologicos meda chi contant sa vida de sas populassiones chi istaiant in s’isula mizza e mizza de annos faghet.

Intre montes, campedas e campagnas si podent biere nuraghes, tumbas de tzigantes, tumbas antigas irfossadas in sa rocca e restos de biddas. Bisitare custos logos est commente faghere unu biazu in su passadu e connoschere menzus s’istoria de sa Sardigna e de sas tzivilidades chi ant bividu s’isula prima de s’arrivu de sos romanos.

Unu de sos sitos prus connoschidos est su Nuraghe Ruinas, chi si agattat in s’iscrocca de Arzana. Custu nuraghe est unu de sos prus artos de sa Sardigna e si agattat in d’una posissione crara dae sa cale si podent biere sos montes de su Gennargentu. In s’iscrocca de Triei si agattat sa Tumba de sos Tzigantes de Osono, unu de sos monumentos de interru prus importantes de s’Ozzastra. Un’atteru situ interessante meda si agattat in s’iscrocca de Bari Sardo, inube bi est su Nuraghe Sellersu. In s’iscrocca de Cardedu si agattat invetzes sa Necropoli de Monte Arista, una zura in sa cale sunt bistadas agattadas tumbas meda irfossadas in sa rocca.

Intre sos sitos prus importantes de s’Ozzastra bi est fintzas su cumplessu archeologicu de s’Ortali’e su Monti, in s’iscrocca de Tortolì. Si trattat de unu de sos sitos prus bisitados de sa zura e accansat monumentos divressos intre sos cales unu nuraghe mannu, una tumba de sos tzigantes e restos de biddas antigas. Importante meda est fintzas su situ archeologicu de s’Arcu ‘ e is Forros, in s’iscrocca de Villagrande Strisaili. Custu logu fuit una bidda nuragica manna chi in passadu teniat fintzas unu rolu religiosu e de negossiu. Sos archeologos ant agattadu restos de cresias, magasinos e buttegas po tribagliare sos metallos.

S’Ozzastra est duncas un terra ricca de testimonzas archeologicas chi permittint de iscoperrere s’istoria prus antiga de sa Sardigna. Sos nuraghes, sas tumbas e sas biddas antigas sunt unu patrimoniu pretziosu meda chi contat s’issida de s’isula. Bisitare custos logos cheret narrere connoschere menzus su tempus passadu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22