Sardigna sutta su fogu de su sole: una chida affocada a sas palas, ma a su fundale arribat s’assulenu.

Est bistada una chida de ifferru po totta sa Sardigna, chi est bistada arbigada dae un’aundada de cardu affocadu chi che at fattu pigare sa temperadura a pius de 40 grados in medas zuras intro de s’isula. Sa basca at corpadu in manera particulare su Campidanu, sa Gaddura e sas scroccas tzentrales comente su Nugoresu, inube s’aera est divennida casi allupposa.

In carchi logu de campagna, sos termometros ant toccadu puntas de record iffrisande sos 43°C, accumpanzados dae nottes cardas meda in sas cales su termometro no est mai caladu sutta sos 26-27°C. Sas dies sunt bistadas marcadas dae abertia meteo, fogos alimentados dae su bentu cardu e dae unu sole cardu chi at postu a proa tosta no solu sos tzittadinos, ma fintzas sos operadores de sas campagnas e sos turistas. Sas bullettas de sa Protetzione tzivile regionale ant faeddadu craru meda: cundissione de arriscu e imbidos a sa prudentzia, mescamente po sas fascas pius debbiles de sa populatzione. Ma bi est una bona nova: sa chima de su cardu parte chi siat giai binchida.

Giai dae custu fine chida, sa pressione arta africana chi at dominadu s’iscenariu metereologicu est attrassande abbellu, dassande logu a agheras coladas pius caldumas chi arribant dae s’Atlanticu. Sas temperaduras ant incumintzare a minimare a pagu a pagu, torrande a balores pius agguantabiles, mescamente in sas oras de su sero e de sa notte. Fintzas s’umididade diat teppere calare, rendinde s’aera pius pagu bascosa.

Secundu sas prenettas, in sas dies pius accurtzu nos isettat unu clima meda pius vivibile, cun massimas chi ant a essere intra 30 e 34 grados in sas scroccas de s’internu e pius accantu a sos 28-30 grados in sas costas , inube ant a arribare fintzas artzanas marinas pius friscas.

In suma, pustis de dies buddidas chi ant revertidu sa Sardigna in d’una furraghe, s’istiu de s’isula, paret chi siat torradu a una grandesa pius normale. Su cunsizzu, in donzi modu, addurat balidu: iscansare sas oras tzentrales de sa die, buffare meda e prestare attentzione a sos sinzales de su corpus. Su peus paret passadu, ma s’istagione est ancora longa.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Eletziones provintziales a capudanne e bia libera a s’accabidu de su bilanciu: sa linea de sa Giunta Todde.

Sas eletzione po rennoare sas Provintzias sardas ant essere in cabudanne. Sa cunvocatzione uffitziale at arrivare intre sa fine de triulas, comente prenettat sa leze.

L’ at cunfirmadu sa presidente de sa Regione, Alessandra Todde, accabbadu s’addobiu de majoria chi si est fattu oe in Cunsizzu regionale, pagu prima de s’accorrada de sa Giunta. Todde at accraradu chi non si prenettant dilatas, pro itte donzi mudamentu de su calendariu de sas eletziones diat ispettare a su Cunsizzu regionale, e a custu mamentu no si est discutinde de cambiare sa leze. Su caminu addurat duncas deffinidu dae sa leze approada a innantis, chi ghiat sa colada dae sas Provintzias cummissariadas a organismos eleggidos.

In su mentre de s’addobiu, sa maggiorantzia at cundivididu su bisonzu de torrare a votare in manera deretta, intentu chi bi est fintzas in sa proposta fatta dae pagu de leze natzionale. S’intentu est cussu de binchere in manera deffinitiva sos effettos de sa leze Del Rio, chi medas de s’alleantzia cussiderant comente mesu de criticidade in sa conduida de sos entes locales. Intre sos temas accomettados fintzas sa situatzione de sos casi chentu
Comunes sardos chi ant a deppere votare s’annu imbeniente, una cosa chi aiat pesadu dudas supra sa partecipassione de amministratziones accanta a sas iscadentzias. Intames, sa Sardigna addurat s’unica regione italiana cun Provintzias chi sunt cummissariadas, cosa chi sos de sa majoria pensant chi no siat pius possibbile.

A su tzentru de sa zoronada puru s’accabidu de su bilanciu preparadu dae s’assessoradu ghiadu dae Zuseppe Meloni. Sa manovra, chi balet casi 800 miliones de euros, at essere approada a sero dae sa Giunta po che la podere mandare a sas cummissiones chi tenent sa cumpetentzia. S’intentu est de alcansare unu bia libera in presse dae s’Aula, rispettande sas iscadentzias de s’esercitziu finantziariu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22