Iscrittas contra Meloni e Frades de Italia supra sos muros de unu teatru in Othieri.

Supra sos muros de su teatru Fallaci de Othieri, in Provintza de Tattari, sunt apparessidas iscrittas innoriosas e minettas de morte contra sa Presidente de su Cunsizzu, Giorgia Meloni, e a sa ischeriada de Othieri de Frades de Italia, Barbara Polo. Sas iscrittas, fattas cun tinta spray ruggia e niedda, incluidianta  issidas fortes meda.

Su casu est accadessidu pagas oras prima de un’abbenimentu programmadu in su Liceo “Duca degli Abruzzi” de Othieri, inube sa ischeriada diat
aere teppidu addobbiare sos istudiantes po una dibatta supra sos temas de sa politica e de sas istitutziones. Custos addobios, ordiminzados po favoressere su negossiu intre sos zovanos e sos politicos, punnaiat a suzihare sa partezipatzione attiva de sos istudiantes a sa vida democratica de sa bidda.

Sa politzia est intervennida in presse meda po che iscancellare sas iscrittas e ant fattu partire scruccullas po chircare de cumprendere chie siat bistadu a faghere tottu custu. Si sunt abbaidande sas figuras de sas telecameras de custodia de sa zura po chircare de connoschere sos chi sunt suspettados. Po como, nissunu at recramadu su chi est bistadu fattu, ma sa politzia no escluidit sa pista chi che leat a ballumenes de sa manca. S’abbenimentu at bessidu a pizu un’unda de indignassione in sa politica italiana.

Othieri, chi est semper bistada cunsiderada una bidda calma, est addurada iscuttinada dae s’abbenimentu. Medas tzittadinos ant nadu de essere preoccupados po s’aria pesante chi paret siat bessidnde a pizu in logos pitticcos.

S’amministrassione comunale at cundennadu in manera frimma s’abbenimentu decrarande chi “assiones de malu fachere e minettas non depent agattare logu in sa comunidade nostra”. De prus, at abbisadu chi ant essere affortigados sos controllos de siguresa in sas iscolas e sos logos pubbricos po prevennere atteros abbenimentos comente custu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Disaura in mare in Santa Maria Navarrese: duos piscadores mortos in s’affundamentu de sa barca insoro.

Santa Maria Navarrese- Est una zoronada chi at addurare imprentada in sa memoria de sa comunidade ozzastrina cussa de eris, merculis 11 de frearzu 2026.

Unu sinistru in mare,grave meda, at assorrobbadu duas vidas e at discossoladu sos de famiglia, amigos e cumpanzos. Unu piscaggiolu de Santa Maria Navarrese est affundadu attesu dae sa costa de Santa Maria Navarrese e su bilanciu est drammatigu: duos piscadores ant perdidu sa vida, e un’atteru est resessidu a si salvare.

Su sinistru est accadessidu eris  manzanu a tardu, mentres s’echipaggiu fuit impignadu a faghere sas cosas de donzi die. Pro motivos chi depent essere atzertados, sa barca paret chi eppat tentu problemas fintzas a che calare a fundu in d’unu trettu in su cale s’abba est meda funduda.

Sas cundissiones de su mare non fuint de sas menzus e custu diat podere aere dadu unu contribbudu e faghere divennere prus diffitziles sas manovras de emergentzia e sos succursos.

Sa cramida est partida in presse meda. Sos succursos si sunt attivados a sa lestra cun s’interventu de sa Guardia Costiera e atteras barcas chi bi fuint a lacanas. Un’atteru piscaggiolu chi fuit accanta est resessidu a accattare unu de sos tres marineris, istratzandelu dae sas undas.

S’omine, s’unicu chi si est salvadu, est bistadu affidadu a sas curas de sos duttores: sa cundissiones suas, secundu cantu si narat, sunt firmas. Po sos atteros duos marineris, cun dolu mannu, non bi est bistadu nudda de itte faghere. Sos duos piscadores arribaiant ambos dae s’iscrocca de Santa Maria Navarrese e fuint connoschidos meda in s’ambiente de sa pisca, chi est dae semper una parte de fundamentu de s’identidade e s’accolomia locale.

Eris sunt bistadas oras de segacoro po Santa Maria Navarrese e po totta s’Ozzastra. Supra su portu e in sas carrelas de sa bidda si alenaiat incredulidade e dolore, mentres sa nova s’isparghiat a sa lestra intre sas famiglias de sos piscadores e de sos tzittadinos.

In medas si sunt istrintos a inghiriu de sos parentes de sos piscadores, bocande a pizu bighinantzia e cordozu. Sas autoridades chi tenent sa cumpetentzia sunt tribagliande po chircare de cumprendere itte potat essere sutzessu e accrarare sos motivos de s’affundamentu. Fintzas a custu mamentu non si podet escluire nudda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22