Est bistada produida sa prima petta de anzone IGP cun zero paporadas,tottu ecologica e sanidosa, una de sas saporidesas pius connoschidas de sa Sardigna. Custu risurtadu istravanadu est meritu de Pedru Ledda, unu giovanu pastore de Sindia, premiadu cun s’Oscar Green po s’impignu modernu sou.

Pedru at retzidu su secundu Oscar Green in s’abbenimentu ordiminzadu dae Coldiretti, chi premiat sos mezoros in su campu de sa laurantza e de su mandigare italianu. Su disignu “VERSOA”, premiadu in sa campu de “Fare Filiera”, est bistadu isfroscadu imparis cun sa Setzione de Agraria de s’Universidade de Tattari, sa BS-GREEN, 15 pesaduras de su Consorziu po sa tutoria de s’Anzone de Sardigna IGP e sa Daga Carni. Custu disignu at deffinidu una filera de produssione de anzone Sardu IGP, declaradu a zero paporadas, cun su sinnu BsGreen Neutry-food.

“So meda cuntentu de anima e de corpus po custu riconnoschimentu chi premiat una filera chi si podet agguantare e a zero paporadas,” at nadu Pedru Ledda.”Dimustrat chi sa laurantza italiana podet essere rispettosa de sa natura, produire calidade arta e agguantare tottu sa filera.

Su presidente de Coldiretti Sardigna, Battista Cualbu, at bantadu su disignu po sa modernidade e sa possibilidade de lu podere faghere. “Custu premiu est meressidu e mustrat una modernidade manna po s’allevamentu italianu, chi su Consortziu de tutoria de s’Anzone de Sardigna Igp e medas allevamentos sardos ant agguantadu.”

Puru Luca Saba, direttore regionale de Coldiretti, at evidentziadu s’importantzia de s’Oscar Green. “Mustrat sa bivesa e sa bena de sos zovanos nostros in su campu de sa laurantza. Coldiretti agguantat meda sos zovanos, chi sunt su tempus benidore de custu campu. Sos istudios ant mustradu chi sa produssione de petta de anzone Igp tenet unu bilanciu carbonicu aguali a zero, faghindela divennere sa prima petta de erbeghe a su mundu declarada carbon neutral.

Custa declaratzione balorizat su tribagliu de sos allevadores sardos e garantit s’accottu a sos cossumadores. Su disignu mustrat chi medas atteros allevamentos IGP sunu prontos po alcansare su documentu carbon- neutral, ispighinde sa laurantza sarda in d’unu tempus benidore chi si potat agguantare.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sa bela manna torrat in Sardigna, s’isula at accasazzare una tappa prima de s’Americas Cup n°38.

Sa bela manna internatzionale est pronta a torrare in Sardigna. S’isula at accasazzare difattis sa prima gara de ammaniada de sa 38° Americas Cup, abbenimentu chi at a finire cun s’assignadura de su premiu in Napoli in su mese de Triulas 2027. Sa Regione at accraradu s’accordu chi at a permittere a sa Sardigna de bintrare pro sa prima borta in s’istoria de sa cumpetissione de sa bela prus de archida a su mundu.

Mancari sos particulares organissativos non siant bistados ancora deffinidos de su tottu, su logu prus probabbile de sa gara est Casteddu. Sa tzittade printzipale sarda est dae annos sa base de sas operassiones de Luna Rossa e est cussideradu unu de sos campos de gara ideales pro sas cundissiones de su bentu, calidade de sas abbas e logos de appozzu, elementos de fundamentu po accasazzare abbenimentos de custu livellu.

Pro sa Sardigna si trattat de una ghirada ispettata po meda tempus. Sas World Series de s’Americas Cup aiant giai iffrisadu s’isula in su tempus passadu, ma chentza mai esecutare. Una prima tentada est de su 2020, cando s’abbenimentu fuit bistadu iscancelladu pro su Covid. Una secunda occasione fuit prevedida po su mese de Santuaini 2023, cun garas in disignu dae su 12 a su 15 de su mese, ma fintzas in cussu casu tottu est bistadu annuddadu  meda tempus prima, intre condierros e tesones intre sa Regione e sos ordiminzadores neozelandesos, chi aiant battidu a sa
tramuda de sas garas in Jedda, in Arabia Saudita.

Sa delusione fuit pustis accreschida cun s’assignadura de sa 38° Americas Cup a Napoli, unu seperu chi aiat addescadu fintzas una dibatta importante de sa politica. Sa preparassione  chi si depet faghere in Sardigna est ora una ispecie de riscattu po s’isula, chi at a podere accasazzare sas primas garas uffitziales de su ciclu novu de sa cumpetissione e torrare a su tzentru de su giru belicu internatzionale.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22