S’insegnante, Marisa Frascescangeli, at a pòdere torrare  a iscola, in  sas elementares de Santeru petzi a pustis de su 16 de abrile: «So bivende unu bisu malu, mi mancant sos pipios meos»

Pagas dies in antis de Nadale aiat resadu unu Ave Maria cun sos dischentes suos, e aiat fatu cuncordare a sos pipios unu piticu rosàriu de perlas, ma pro more de custa initziativa est istada istesiada  dae iscola pro 20 dies. S’initziativa de sa mastra no est istada agradèssida dae totus sos babbos e sas mamas de sos pitzinnos. Pro custu est istada istesiada dae iscola pro 20 dies e at a tènnere una reduida s’istipèndiu. Marisa Francescangeli, maistra in s’iscola primària de Santeru, non tenet faeddos. «Paret unu bisu malu — at cunfessadu -. Mi dia èssere ispetada de totu, ma mai unu provedimentu che a custu. Mi mancant sos pipios meos, mi mancat su traballu meu. No apo fatu nudda de malu».

Marisa Francescangeli, classe 1965, at a pòdere torrare a insegnare su 16 de abrile ebbia. Prima no at a pòdere barigare su limenàrgiu de s’iscola de bia de Umberto.

«Su 22 de nadale fia in classe pro sostituire unu collega meu. Sende chi mancaiant pagas dies a Paschighedda, apo detzìdidu de realizare cun sos pipios unu rosàriu piticu. Posca amus resadu paris su Babbu Nostru e s’Ave Maria. Pro mene una cosa normale, e difatis non mi pariat de àere fatu nudda de grae». Ma duas mamas si sunt chesciadas cun su prèside, Alessandro Cortese: «Duncas-  at naradu sa mastra — so istada cunvocada pro partetzipare a un’addòbiu cun custos babbos e su prèside. Mi so finas iscusada de s’atzione, ammentende però chi a su cumintzu de s’annu aia pedidu a totu sos babbos su permissu de pòdere resare cun sos pipios unas cantas pregadorias. Nemos si fiat lametadu».

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

LIFE Safe for Vultures, su disignu ambitziosu chi si proponet de garantire s’iscampamentu po unu tempus longu meda de sa populatzione de Benturzos in Sardigna, est arribande a unu momentu detzisivu e chi ichendet. Paris a sas comunidades de su logu, chi sunt derettu interessadas, espertos de tottu su mundu,operadores de su campu, appassionados e sas organissasiones pubbricas, sos chi partetzipant a su disignu, tzelebrant unu de sos risurtados pius importantes.

Custu abbenimentu no est solu unu puntu de arribu, ma marcat puru s’incumintzu de unu momentu nou in s’impignu po podere costoire custa ispetzie conica.

Su prossimu martis 16 de aprile, cummintzande dae sas 10.30 in s’apposentu apparitzadu gratzias a sa gentilesa de su Comune de Villasalto in su mesudie de sa Sardigna, bi at essere unu abbenimentu pubbricu de importantzia meda. Ant essere torrados a biere sos puntos de fundamentu, chi ant permittidu custu risurtadu de carraffale: at essere illiberadu su primu ballumene de benturzos in cussu logu.

Custu momentu, non solu est unu signu de sutzessu po s’impignu chi tottu paris ant postu, e chi est duradu annos, ma evidentziat puru s’importantia de sa coperassione de partes divressas chi tenent interessiu, po diffendere sa diversidade biologica de su logu.

Sa presentzia de espertos de tottu su mundu, paris cun sas comunidades de su logu e sos amigos de sos benturzos, una retza chi est semper creschinde de volontarios chi si sunt dedicande a custa cajone, evidentziat sa galabera e s’impignu ispartos in tottu su mundu, po salvare custa ispetzie minettada. In su mentres de s’abbenimentu, ant essere postas supra de sa mesa, esperientzias, connoschentzias e isbirgos po garantire una conduida chi potat agguantare sa popolatzione de sos benturzos, non solu in Sardigna, ma puru in atteras partes de su mundu, inue custas magniffigas creaduras ,accommetant isfidas commente custas.

S’addobiu at essere puru un’occasione po addulgare su rolu de fundamentu de sas comunidades locales e de sos volontarios po su sutzessu de custu disignu. Su custante impignu e sa dedissione insoro, ant permittidu de arribare a cumprire custu disignu e apparant un’isperantzia chi si podet toccare cun sas manos po su tempus benidore de custa ispetzie. Po mesu de sa collaboratzione de sos tzittadinos e s’accottu de sa parte pubbrica, de sas organissasiones de de sos singros podimos sighire a diffendere e conservare su patrimoniu de sa natura de sa Sardigna e de su mundu intreu.

Po congruire, s’accadessimentu de su 16 de Aprile est unu momentu de tzelebrazione e de meledu supra sa carrela fatta e sas isfidas de su tempus benidore. Est puru un’occasione po s’impignu de ponnere tottu paris po conservare e faghere cosas pratigas po garantire chi su benturzu e atteras ipsetzies debiles, pottant sighire a bolare. Custu est solu
s’incumintzu de unu percursu longu chi at a dimandare atteru impignu, collaboratzione e determina, ma est puru unu momentu po abbaidare a daenanti cun isperantzia e cunfiantza po unu tempus benidore, in su cale su benturzu e tottu sas meravizzas de sa natura pottant prosporare.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22