Est unu lagu ma in su matessi tempus unu parcu naturale in ue est possìbile praticare vàrias fainas a s’àera aberta, dae su trekking a s’apicada, dae sas escursiones in canoa a su biking. S’agatat in su Sarcidanu, in su tzentru-meridionale de sa Sardigna.

In mesu a su lagu s’agatat unu pitica isuledda, e in mesu a s’ìsula s’agatat sa crèsia de santu Sebastianu, chi s’ispricat in s’abba lughente faghende gioghitos colorados in s’abba e pintende su panorama ammajadore. Su lagu leat su nùmene pròpiu dae s’edifìtziu sagradu. Pro bi lòmpere est a agafare sa canoa opuru, pro sos prus animosos e capatzos, a nàdidu. Sa crèsia est inghiriada dae maicantas paristòrias e contos antigos.

Su lagu de santu Sebastianu, in su territòriu de Ìsili, est formadu dae sa diga de is Barrocus chi serrat su riu Mannu. In sas abbas suas, in sas ribas e in sos inghìrios si pòdet praticare pisca isportiva, canoa, apicada e escursiones. In prus b’at su percursu de su Treninu Birde, chi colat costa costa a su lagu e sighit finas a Sòrgunu. Sa lìnia ferruviària betza, imbetzes, chi giughiat a su Mèdiu Campidanu, como in disusu, est perfeta pro trekking e mountain bike.
Santu Sebastianu est alimentadu fintzas dae su riu Corrigas: subra de sas ribas suas si pesant pinnas de monte  formadas unos 23 milliones de annos a oe, cando bona parte de sa Sardigna fiat galu suta abba. Amantiosos de apicada isportiva arribbant dae totu Europa e iscalant muros a pèntuma chi presentant in prus de treghentas ‘bias’ apuntzadas cun vàrios grados de dificultade. Fintzas free climber professionistas de livellu internatzionale sèberant sas rocas calcàreas de sa zona de is Barrocus, frecuentadas totu s’annu, mescamente sas de su Pizzu ‘e Nedda, chi si nde pesant in unu canale istrintu formende bacos isfundos ammajadores.

Su territòriu de Ìsili est prenu fe rastros preistòricos: menhir, tumbas megalìticas, domus de Janas e 48 nuraghes, comente sos  Is Paras e e Nuraxi Longu. B’at fintzas sos restos de insediamentos pùnicos e romanos, mescamente duas arcadas de unu ponte in su riu Brabaciera de su sèculu III d.C. De non pèrdere est su tzentru istòricu de sa bidda,  cun crèsias de cabbale e su museu pro s’Arte de su Rame e de su Tessìngiu, ùnicu in Sardigna.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Stefano Oppo, braga de su canottaggiu sardu, at segudadu unu nou sonniu de sa carriera sua paris cun su cumpanzu Gabriel Soares,triunfande in sa porfia de cropa de sos carricos lepios, in s’urtima fase de sa Coppa de Su Mundu de Canottaggiu in Varese.

Sa binchida insoro est bistada unu triunfu, non solu personale, ma puru po s’isport de sa Sardigna, chi si est distintu supra de s’iscena internatzionale. Su primu postu in sa porfia de cropa carricos lepios est bistadu su puntu de arribbu de unu isforzu istravanadu de sos duos isportivos, chi si est bidu meda in su finale de sa porfia, chi che at bogadu s’alenu.

Chentza duda, unu momentu chi non si at podere ismentigare po issos, e unu motivu de arroddu mannu po sa comunidade isportiva sarda.

Stefano Oppo, naschidu in Aristanis, est arribadu a sa chima de sa carriera sua, binchinde s’oro in sa Coppa de su Mundu, paris cun Gabriel Soares, in sa cropa carricos lepios. Sa proa insoro est bistada desamplada,addobbande sos ribales isvizzeros Jan Schaeuble e Raphael Ahumada, in sos urtimos momentos de sa porfia.

Una cumpetissione ammaghiante chi si est congruida cun sa conchista prena de gloria de sa medaglia de oro, mustrande unu arrebattu prenu de emotzione po sas Olimpiades de Parigi de su mese de lampadas de cust’annu.

Una binchida emossionante, accantzada cun d’unu recuberu istravanadu in sos urtimos metros contra s’Isvizzera, chi at dominadu sa porfia po casi tottu sa dura. Semus meda cuntentos, pro itte custa medaglia de oro est po nois unu riscattu beru, at cummentadu Oppo pustis de sa fine de sa porfia.

Commo, po s’atleta sardu, bi ant essere duas chidas de riposu e allenamentos cadrios, aspettande sos Campionados Europeos, chi si ant a faghere in Szeged in Ungheria, dae su 25 a su 28 de Aprile. At essere un’attera occasione po affortigare sa binchida insoro e sighire a essere su menzus de sa Sardigna e de s’Italia in su cataffale internatzionale de su canottaggiu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22