Faeddos malos e  vernitze niedda in sos murales  Galleria del sale in Casteddu. S’artista s’est in deretura a traballu pro chircare de sarbare donare vida noa a sos murales de su museu a chelu abertu.

Una surra de faeddos malos contra su presidente de su Casteddu Tommaso Giulini ant insugiadu sos murales de sa Galleria de su sale, sa prima òpera de arte cuntemporànea a chelu abertu de Casteddu: unu museu chi regollit a pare murales realizados in sos annos dae artistas de fama internatzionale.

Si tratat de noe sas òperas chi sunt istadas arruinadas cun vernitze niedda dae sos tifosos. Una de custas est cussa de su giòvanu artista sardu Lorenzo Murgia, : “Apo ischidu chi s’òpera mea est istada impriastada cun colore nieddu, ma a mie non mi nde importat meda– at naradu s’artista a sos giornalistas – a mie mi praghet s’idea de istratificare e agiornare s’òpera, ma non cumprendo pro ite est istada impreada sa vernitze niedda e pro ite calicuna iscrita est istada cugugiada e àteras nono. Dia bòllere cumprèndere su critèriu”. Murgia est su primu de medas  artistas chi ant a èssere impinnados in sa ristruturatzione de sas òperas.

“Amus a torrare a dare  unu significu e unu sentidu artìsticu a cuddos muros e non a sa propaganda polìtica o a sa tifoseria – at naradu Daniele Gregorini, curadore de sa Galleria – però non  cherimus però cundennare chie iscriet frases de amore in su muru. Invitamus a totus sos chi  sèberat de iscrìere in  unu muru a resonare a fùrriu a su fatu chi cuddu logu est de totus, tocat a èssere cuscientes de su recadimentu colletivu chi cada atzione cumportat; in su tempus amus tentu vàrias interatziones cun sas òperas, fintzas de sas persones sena domo chi ant impreadu unu pennarellu pro iscrìere, e duncas pro allegare, cun unos cantos murales. S’idea de s’artista – concruit Gregorini – est cussa fàghere un’òpera pro s’umanidade, e mi dimando cale siat su recadimentu comunitàriu de chie sèberat de impreare su nieddu, comente chi èsseret una forma de tzensura, pro comunicare. Pro cale motivu?”.

“Progetu finantziadu cun s’Avisu Pùblicu IMPRENTAS annualidade 2021-2022”

S’atteru manzanu, bi est bistada un’accorrada importante meda de su comidadu de sa provintzia de Nugoro, de s’ordine e sa seguresa pubbrica, cun sa presidentzia de su Prefettu de Nugoro Dionisi, a sa cale ant partetzipadu sos cumandantes provintziales de sas Fortzas de s’ordine, e de sa polizia de sos cartzereris Antoni Galati. S’argomentu printzipale est bistadu un’attera borta cussu de s’emergentzia chi bi est in sa presone de Badu e’ Carros, una chistione custa, chi est dimandande interventos chi si leant tottu paris.

Respundinde a s’imbiu de s’Esercitu po controllare sa presone dae sa parte de fora, si ispettant interventos puru da parte de s’amministrassione de sa Presone. Su provvedidore at isboddiadu tottu sos particulares de s’imbiu intro de pagu tempus, in Sardigna de 71 agentes mascros,21 feminas e 34 arrezzentes, chi arrivant dae sos cursos
chi sunt finidos dae pagu.

Su segretariu generale de sa Uil Pa Polizia de sas Presones de sa Sardigna, Migheli Cireddu, at faeddadu de sa desemplada assione leada dae su Prefettu Dionisi, chi at collaboradu meda cun su Provvedidore Galanti, po i sfidare sa situassione cun meda detzisione. Bell’e gai, Cireddu at evidentziadu chi s’imbiu de personale nou, est solu unu signale positivu, no est sa solutzione deffinitiva, ispetzie si cunsideramos sos pensionamentos chi ant esser fattos in pagu tempus.

Su personale de sa polizia de sa presone, in manera particulare in Nugoro e Tattari, sighint a tribagliare in manera precaria, cun orarios de tribagliu longos meda e paga claresa de su controllu. Cireddu at nadu puru chi bi est s’abbisonzu de torrare a ordimizare su tribagliu e de interessare de pius sos sindacados in custu processu, in manera chi sas intetziones bonas de sas istitussiones si potant traduire in assiones e mesorias beras.

S’impignu de onzi die, de su cumandu regionale e de su Prefettu, est appretziadu meda, ma est urgente chi si passet dae sas ideas a sa pratichesa,interessande sos de sos sindacados in s’ordimizu de su tribagliu. Solu in custa manera si at a podere iscansare chi carchi derettura e cumandante, mancari tenzant sas menzus intentas, sigant a
faghere dannos mannos a livellu logale.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22