Sa Reina Elisabeta II est morta a s’edade de 96 annos a pustis de àere afrontadu diversos problemas de salude. S’annùntziu est arribbadu in sos profilos ufitziales de sas retes sotziales de sa Famìlia Reale: “Sa reina est morta custu merie in manera paghiosa in su casteddu de Balmoral – si leghet in su messàgiu publicadu a ora de oras 19.30 -. Su re e sa reina cunsorte ant a abarrare a Balmoral custu sero e ant a torrare a Londra cras”. Petzi un’annu a oe est mancadu su maridu de Elisabetta, su Prìntzipe cunsorte Filippo, chi sa reina aiat cojuadu in su 1947 e de su cale aiat tentu sos bator fìgios Carlo, Anna, Andrea e Edoardo. Elizabeth at seberadu de colare sas ùrtimas oras de sa longa vida sua a Balmoral, in Iscòtzia, dae semper su logu suo de su coro in ue colaiat semper s’istiu. Inoghe at seberadu de abarrare in sas dies coladas nointames s’impinnu de dèpere presidire a su coladòrgiu de cunsignas de su primu ministru britànnicu, dae Boris Johnson a Liz Truss. Sa prima borta in s’istòria sua sa residèntzia est devènnida sede de custu momentu istitutzionale de importu pro su Regnu Unidu.
Nàschida su 21 de abrile de su 1926, sa Reina Elisabeta est sa reina de sos primados: petzi Luisi XIV, su re Sole,fiat abarradu in su tronu prus de issa. Dae cuddu 6 de freàrgiu 1952, data de sa morte repente de su babbu, Giorgio VI, sa reina de Inghilterra at regnadu 70 annos e 214 dies. Elisabeta, chi in làmpadas at tzelebradu su Giubileu de plàtinu, at conchistadu custu segundu postu in sa classìfica de sos regnantes prus betzos su 13 de làmpadas coladu, cando aiat superadu Rama IX de Thailàndia, chi ateretantu aiat regnadu 70 annos e 126 dies intre su 1946 e su 2016. Elizabeth est cussa chi at regnadu prus a longu in Bretagna Manna, aende superadu sa reina Vitòria giai su 9 cabudanni 2015: sa trisaja fiat abarrada in su tronu 63 annos, 7 meses e 2 dies, finas a su 1901. Sos sùdditos de Sua Maestade sunt 150 milliones in totu su mundu.
“Progetto finanziato con l’Avviso Pubblico IMPRENTAS annualità 2021-2022”