Nùgoro Iscritas de meletzu sunt istadas agatadas custu mangianu in sa zona de Fàrcana in su monte Ortobene, contra su sìndigu de Nùgoro Andrea Soddu. “Soddu codardo t’isetat su bandu” b’at iscritu in sa prima frase fata cun vernitze ruja subra de unu muru, e a suta: “Pro unu cadirone in Europa ti ses bèndidu sa salude nostra, gràtzias sìndigu Soddu”. Custu ùrtimu messàgiu si referit a sa possibilidade chi su primu tzitadinu de Nùgoro, chi in su 2019 si fiat candidadu a su Parlamentu europeu comente indipendente in sas listas de su Pd, intret in s’istitutzione Ue, si s’at a liberare su postu chi a su presente ocupadu dae Caterina Chinnici, candidada a sa presidèntzia de sa Regione Sitzìlia in sas eletziones de su 25 de cabudanni. Su riferimentu a sa salude est dudosu, ma diat pòdere èssere acapiadu a sa situatzione de s’ispidale de Nùgoro chi at dimensionadu e serradu unos cantos repartos e pro su cale 117 mèigos dipendentes ant presentadu un’espostu in Procura.
“Solidariedade e bighinàntzia a su sìndigu de Nùgoro Andrea Soddu pro sas iscritas de meletzu”: sunt sas paràulas de su presidente regionale de s’Anci Emiliano Deiana, a pustis de sa noa de sas iscritas de meletzu essidas custu mangianu in su monte Ortobene. “Torra un’amministradore locale est fatu ogetu, in Sardigna, de una ‘pràtica’ gasi grae a su puntu de ndecunditzionare sa vida de ogna die e cussa amministrativa e a nde minare sa serenidade – sighit Deiana – Sa pràtica de sas delegitimatzione pùblica impreat sas bacheche virtuales e cssas materiales pro atacare chie, dae semper, est in sa prima lìnia a difèndere sa comunidade pròpia fintzas subra de matèrias chi non sunt de cumpetèntzia direta de s’amministratzione e de sos comunos”.
“Progetto finanziato con l’Avviso Pubblico IMPRENTAS annualità 2021-2022”