Unu defibrilladore semiautomàticu in memòria Lorenza Cirronis, giòvana morta prima de su tempus in su 2006 a 35 annos. A fàghere sa lassa a sa bidda de Pabillonis arribbat est istadu Alessio Atzori, imprendidore chi est semper istadu a probe de sa famìlia Cirronis chi at bòlidu regordare a Lorenza in custu modu, sighende peri sa voluntade sua.
Alessio duncas at comporadu e regaladu su Comunu de Pabillonis unu defibrilladore semiautomàticu a norma pro lu pònnere a disponimentu de sa populatzione in casu de bisòngiu. “Apo detzìdidu de rèndere cuncretas sas voluntades de Lorenza, bènnida a mancare tropu giòvana. L’amus a collocare in ocasione de sa data de sos 50 annos suos. Su defibrillatore at a èssere, pùbblicu, adisponimentu de totu sa colletividade a totu die”. Una lassa chi est istada possìbile gràtzias a s’agiudu professionale de Simona Buono pioniera in Itàlia de sa cultura de sa defibrillatzione primidia . “Simona est istada professionale e disponìbile. Nos intendimus meda a su telèfono e issa mi agiudat e mi suportat in sa gestione de sas pràticas e at a èssere de seguru su primu defibrilladore de una longa sèrie chi amus a collocare cun issa, gràtzias a sa consulèntzia sua”.
Alessio s’at a fàghere càrrigu de s’installatzione , lassende a su Comunu sa mantenidura ordinària de su machinàriu sarvavida. B’at però calicuna crìtica: “Creo chi totu sas amministratziones pùblicas si depant impinnare meda de prus – at naradu Alessio– pro fàghere a manera de dotare sos comunos issoro de defibrilladores pro sos tzitadinos. Est unu tema atuale meda, e non faghet a giogare cun sa vida de sa gente. Creo – at concruidu – chi b’apat unu problema de pagu connoschimentu de sa matèria, diat serbire pru comunicatzione e sensibilizatzione subra custu tema gosi importante “.
“Progetto finanziato con l’Avviso Pubblico IMPRENTAS annualità 2021-2022”