Sas òperas sunt istadas fatas dae Marinella Careddu de Tertenia, Danilo Carta de Austis, Francesco Argiolu de Ballau, Michela Casula de Làcani, Fulvio Cocco de Ceraxus, Michele Gerra de Serramanna, Angelo Loi de Thiniscole, Sandro Marchi de Gavoi, Antonio Milleddu de Casteddu, Fernando Mussone de Illorai, Mauro Patta de Atzara e Antonio Orru de Seddori.
In sa bia Manno est istadu riproduidu un’òmine a caddu, in bia Garibaldi su panorama de sa bidda e su traballu de “su carradori”. A sa rugrada cun sa bia Marconi, est retrtu su chi rapresentat sa richesa de sa bidda, mentras in su pòrticu de Josto in bia Cavour, s’iscartzinadòrgiu de s’ua. Artziende imbetzes cara a sa cresiedda sunt istados pintados sos culurgiones, màndigu tìpicu de sa bidda, mentras pagu prus a suta b’est unu murale lughente colore de asulu chi abbellit muru su tzentru istòricu. Dae in antis de sa crèsia bi sunt tres gomares betzas e in bia Itàlia unu retratu lughente de una feminedda betza in costùmene.
Custos murales s’agiunghent a àteras òperas chi sunt istadas realizadas in sos annos passados. S’annu coladu, pro esempru unu grupu de istudiantes, dae sa prima a sa cuinta de su litzeu linguìsticu e de su litzeu sientìficu, ant realizadu in sos locales iscolàsticos sos murales dedicados a tres grandu artistas sardas: Edina Altara, Grazia Deledda a 150 annos dae sa nàschida e Maria Lai. Si tratat de un’idea progetuale isvilupada dae sa professora Fatima Melis cun su suportu de su tutore su professore Roberto Calcagno. Su progetu St-Arte, si fundat subra de s’idea de torrare a cumentzare, cumpresu comente unu puntu de partèntzia (start) pro apresiare sos istudiantes torrende a costrùere su cuntzetu de s’“istare paris” a iscola (stay together) cun s’arte. S’arte si ponet non petzi comente un’importante trastu espressivu de sos sentidos e de sa personalidade individuale, ma fintzas comente momentu importante de cunfrontu e cooperatzione pro sa realizatzione de unu progetu comunu, creende un’ambiente de aprendimentu cooperativu, de integratzione e de sotzializatzione sinèrgicu e costrutivu, cumpromìtidu meda a càusa de sas limitatziones dèvidas a sa pandemia de su covid.
“Progetto finanziato con l’Avviso Pubblico IMPRENTAS annualità 2021-2022”