S’istiu 2022 at a èssere de segutu su prus caente de sos ùrtimos annos in Itàlia e petzi s’àera cunditzionada at a pòdere èssere amiga de milliones de italianos pro pòdere agatare sollievu in dies de bùfidu, ma gosare de su friscu artifitziale diat pòdere costare caru a beru. Non faeddamus de sos costos in bulleta, aumentados a dismisura in sos ùrtimos meses a pustis de su rincaru deretu a càusa de sa gherra in Ucràina, ma de cuddos arriscos chi diant pòdere cùrrere sos automobilistas chi impreant s’àera cunditzionada in màchina foras de unoscantos tèrmines prevìdidos dae sa lege.
Sas règulas de impreu de s’àera cunditzionada in màchina sunt istabilidas dae su còdighe istradale, in s’ispetzìficu in s’artìculu 157 a su comma 7-bis chi imponet saas proibitziones, pena una santzione pecuniària. In s’artìculu mentovadu, difatis, si faghet riferimentu a sa proibitzione assoluta de tènnere alluta sa vetura solu pro tènnere in funtzione s’àera cunditzionada.
“Est fata proibitzione de tènnere su motore allutu, durante sa pàsida de su veìculu, pro more de mantènnere in funtzione s’impiantu de cunditzionamentu de àera de su veìculu etotu” narat su comma 7-bis. Sa norma, andat craridu, s’àplicat siat in s’istiu siat in ierru e in ogni pàsida e firmada, e non balet s’in casu sa màchina siat in movimentu. Non balet, pro totu sas situatziones de “arrestu o interrutzione de martza” dèpidas a su tràficu o a sa firmada obligada in sos semàforos
S’artìculu 157, a su comma 7-bis, narat peri cales sunt sos arriscos de santzione s’in casu benneret violada sa lege. Su còdighe de s’istrada, difatis, faeddat craru: “De sa violatzione cunsighit sa santzione amministrativa de su pagamentu de una summa dae èuros 223 a èuroa 444“.
S’Itàlia no est s’ùnicu paisu chi previdit multas in custa particulare situatzione, ma si si faghet su cunfrontu cun àteros Paisos europeos est de seguru s’Istadu prus severu in assolutu. In Bretagna Manna, pro esempru, sa multa mèdia est de 20 isterlinas. Diferente sa situatzione in Ispagna, in ue sa Guardia Civil est podet fàghere multas de 100 èuros si una màchina si firmat pro meda tempus poderende s’àera cunditzionada alluta.
“Progetto finanziato con l’Avviso Pubblico IMPRENTAS annualità 2021-2022”