Sa de dexi Musas, s’arte de su sèculu, no aiat risparmiadu mancu a Gràtzia Deledda.
In su 1916, su regista Febo Mari aiat propostu a Gràtzia Deledda de impreare “Cenere” su romanzu suu de su 1904, a comente sugetu pro unu film.
Sa scritora sarda fiat giai famada, su cinema, tando ancora mudu, praxiat semper a prus spetadores, sa Deledda aiat atzetadu sa proposta mancare cun pagu cunvitzione, non crediat in su progetu e pro totu su tempus de su traballu de su film e a pustis pro is proietziones fiat abarrada semper indiferente.
Sa scenegiadura e su rolu de sa mama de su protagonista dd’aiant domau a Eleonora Duse, atora teatrale famada meda, ma a s’acabbu de sa carriera cun una personalidade forte e chene peruna esperientzia in su schermo mannu.
S’interpretatzione chi aiat donadu Eleonora Duse, magistrale pro unu pùblicu modernu, ma moderna meda pro is ispetadores de s’època non fiat pragia. Su film chi aiat dèpiu contare sa vida agropastorale in is montes de Fonne, dd’aiant giradu de unu totu in is Alpes, in Piemonte e custu fortzis aiat precuradu cussu ategiamentu de indiferentzia de Gràtzia Deledda. Eleonora Duse, a pustis de s’esperientzia cun su film “Cenere” aiat serradu po semper cun su cinema.
“Progetto finanziato con l’Avviso Pubblico IMPRENTAS annualità 2021-2022”