In Israele, in s’àrea de su Monte Carmelo (Arta Galilea) sunt istados agatados sos restos de una tzitade costruida cun elementos architetònicos chi podent èssere collegados a cuddos nuràgicos, chi diant dimustrare sa presèntzia in cussa zona de populatziones sardas, in unu perìodu individuadu intre su de dòighi e su de ùndighi sèculos a in antis de Cristu. S’annùntziu de custa iscoberta importante est istadu dadu ufitzialmente dae s’Ambasciadore de Israele in Itàlia, Dror Eydar, durante de s’addòbiu suo in Casteddu cun su Presidente de sa Regione Sardigna Christian Solinas.
“Si tratat de una noa meda importante”, at cummentadu su professore Raimondo Zucca, archeòlogu e dotzente de s’Universidade de Tàtari, chi at ammentadu fintzas comente aìamus giai “testimonias de presèntzia de prumu e de prata sarda in Israele, datàbiles dae su sèculu dòighi a su de deghe sèculos a in antis Cristu.” “Ràmene de sas minas israelianas de Tomba in su Negev est istadu posca atzapadu in Sardigna, in sos territòrios de Orroli, Ballau e Ossi, in insediamentos chi torrant de su de ùndighi sèculos a in antis Cristu” at afirmadu Zucca, chi in prus at sutaliniadu comente esserent “fortrs in cussu perìodu sos raportos intre mundu filisteu e Sardigna, comentea dimustrant fintzas sos resurtados de sos iscavos acumpridos medas annos a oe in Israele dae su Professore Giovanni Ugas de s’Universidade de Casteddu paris cun s’archeòlogu israelianu Adam Zertal”.
Sa de s’Ambasciadore israelianu in Sardigna, acumpangiadu dae una delegazione manna, no est istada petzi una bìsita de cortesia istitutzionale, ma fintzas un’ocasione pro istrìnghere raportos semper prus fortes e chircare formas noas de cooperatzione in isvariados campos: dae sas aplicatziones in s’agricoltura de tecnologias giai isperimentadas in àreas desèrticas o cun iscassa disponibilidade ìdrica, a sas energias rennoaditzas e a sas tecnologias pro gherrare sa pesta de sos pibitzios, gràtzias a trastos innovativos giai isperimentados in àreas de crisi, ant caraterizadu s’addòbiu de eris. “Un’amighèntzia semper prus forte acapiat sos pòpulos nostros – at naradu su Presidente Solinas a s’agabbu de s’addòbiu – e est oe possìbile a la declinare in medas campos, creende una cooperatzione durajola e de profetu”.
“Progetto finanziato con l’Avviso Pubblico IMPRENTAS annualità 2021-2022”