S’ìsula nostra est sa richesa nostra. Tutelare, cunservare e avalorare s’immensu patrimòniu ambientale suo rapresentat unu dovere cara a sas generatziones benidoras.
Ambiente e calidade de sa vida. Pro s’amministratzione regionale investire in s’ambiente cheret nàrrere a promòvere s’identidade nostra cara a s’esternu, mòvere dae sa peculiaridade insulare pro abèrrere prospetivas noas de crèschida econòmica, sotziale e culturale, costruire unu modellu cumpetitivu in su batzinu de su Mediterràneu. Un’isvilupu resonadu e programadu de su territòriu, sena tribulare su echilìbriu delicadu de s’ecosistema, rapresentat un’elementu fundamentale pro su megioru de sa calidade de sa vida.
Polìticas ambientales. Pro realizare custos obietivos sa Regione predisponet, in su respetu de sa normativa europea e sighende sas règulas chi disciplinant sos fundos istruturales, su Programa Operativu Regionale e Multiregionale; nòminat sa figura de s’Autoridade ambientale; coordinat e gestit sos atos de Pianificatzione Urbanìstica Regionale; amministrat sas polìticas forestales, de amparu de sa terra e de sas abbas; promovet s’istitutzione de parcos, riservas e àreas naturales pro sa cunservatzione de sos echilìbrios naturales, pro s’amparu de s’habitat, de sa flora e de sa fàuna agreste; predisponet su Pranu de Protetzione Tzivile e sos pranos pro sa preventzione e repressione de sos fogos; sustentat sa cultura de s’ambiente cun campagnas educativas de informatzione e sensibilizatzione; investit subra de sa preventzione, controllu, reduida e sanamentu de s’incuinamentu atmosfèricu, acùsticu e eletromagnèticu; promovet sa gestione integrada de sos refudos, sa bonìfica de sos giassos incuinados e su recùperu de sas àreas a arriscu ambientale elevadu; programat e còmpidat sa salude de su territòriu pro nde prevènnere e reduire sos arriscos ambientales, fintzas pro mèdiu de sa Valutatzione de Impatu Ambientale, individuende trastos normativos chi nde fatzìlitent sa protzedura. Punnat a sa creatzione de Sistemas Informativos Ambientales, a rèndere operativa s’Agèntzia Regionale pro sa Tutela Ambientale e a promòvere trastos voluntàrios de polìtica ambientale de acostagiare a sas Agendas 21 Locales.
“Progetto finanziato con l’Avviso Pubblico IMPRENTAS annualità 2021-2022”