Dae como in susu sa mùsica a presu de su mare s’at a istudare a mesu note a etzetzione de sas dies de chenàbura, sàbadu e prefestivos, cando su lìmite pro sa mùsica a volùmene artu s’at a iscostiare a sa una de note.
Sas règulas noas s’istiu 2022 s’agatant iscritas totus in un’ordinàntzia firmada dae su sìndigu Graziano Milia. Su primu tzitadinu in sas dies coladas aiat giai fatu ischire chi s’intentzione sua fiat sa de pònnere unu frenu a su trèulu causadu dae sos giòvanos chi abarrant iscurtende sa mùsica arta finas a mangianeddu, causende non pagas chèscias dae banda de sos abitantes e residentes de su logu.
“Sa situatzione fiat suta de sos ogros de totus e fiat craru chi non faghiat a andare a in antis gasi, cun sa mùsica a totu volùmene finas a sas primas lughes de s’arbèschida – ispiegat Milia – L’aìamus giai fatu presente pedende un’assuntzione de responsabilidade a sos gestores de sos locales noturnos e chirchende de agatare una solutzione e unu cumpromissu pro more de tutelare sos interessos de sos titulares de sos locales noturnos, ma fintzas sos de sa colletividade. Ma custu l’amus fatu fintzas pro protègere e tènnere cuidadu de unu bene ambientale istraordinàriu comente est su de su Poeto e s’àrea ùmida chi b’est a palas”.
Como su disponimentu nou. “Cun custa ordinàntzia – sighit su sìndigu – semus chirchende de pònnere òrdine e de dare s’oportunidade de traballare, in su respetu de sas règulas e de s’amparu de su cuntestu ambientale. Ma non amus a cunsentire trasgressiones: sa novidade est chi s’ordinàntzia, in prus de prevìdere sa santzione amministrativa pro su mancadu rispetu, est istada assùmida faghende riferimentu fintzas a s’art. 650 de su còdighe penale, chi signìficat chi cale si siat sa violatzione at a incùrrere in unu reatu, cun totu sas cunsighèntzias suas. Su Poetu andat tuteladu, gasi comente su deretu de sos tzitadinos a reposare a pustis de una tzerta ora”.
“Progetto finanziato con l’Avviso Pubblico IMPRENTAS annualità 2021-2022”