Una bitzicleta e sa gana de connòschere sos piticos comunos de sa Sardigna e sa voluntade de èssere de ispiratzione pro sos imprendidores iscoragiados o pro sos prus giòvanos. Custu est s’iscopu de sa pensada de Fabio Puddu.
Fabio Puddu, imprenditore digitale, at detzisu de cambiare vida a pustis de annos colados a bìvere pro traballare e no a traballare pro bìvere. A 39 annos at furriadu de fundu a susu sa vida sua e su traballu suo. At bèndidu soa butegas suas de bestimenta isportiva e s’est dadu a s’impresa digitale, agatende sa passione e mescamente unu echilìbriu giustu intre traballu e vida privada, mescamente como chi est devènnidu babbu de una belle pipia. Su de àere agatadu su giustu caminu de traballu e su de àere individuadu sa crae pro abèrrere sa ghenna de sa serenidade, l’ant giutu a tènnere un’idea chi s’imprendidore at a fàghere devènnere realidade custa chida. Pro fàghere totu custu s’est serbidu petzi de una bitzicleta, sa gana de connòschere sos piticos comunos de sa Sardigna e sa voluntade de èssere de ispiratzione pro sos imprendidores iscoragiados o pro sos prus giòvanos.
Chenàbura chi benit, difatis, est sa die atatzada pro mòvere dae Muristeni cun sa mountain bike e at a fàghere tapa in Senorbì, Mandas, Sueddi, Xrexei, Santu Nàntziu de Làoni e Brevìe pro posca arribbare a Dèsulu, acanta at a colare sa note.
Sa die pustis, semper cun sa furriaincoòscias, at a rugrare su Gennargentu, dae Dèsulu a Àrthana, e posca at a calare conca a Gelisuli, in ue at a allogiare in unu campègiu.
In ognunu de sos tzentros piticos chi at a bisitare, at a dare unu messàgiu virtuosu de sa filosofia de s’impresa digitale, ponende·si a su servìtziu de sos imprendidores chi s’ant a chèrrere cunfrontare cun issu pro tènnere ispiegatziones, cussìgios, incoragiamentos, o chie l’at a chèrrere ascurtare s’istòria de Fabio o contare sa sua.
Unu grupu de piseddos, fintzas issos imprendidores digitales, ant a sighire in Instagram s’impresa de Fabio dae Muristeni a s’Ogiastra. L’amus a sighire nois puru!
“Progetto finanziato con l’Avviso Pubblico IMPRENTAS annualità 2021-2022”