Sa campagna de iscavos noa in su giassu de sa necròpoli nuràgica de Mont’e Prama, aviada su 4 abrile coladu de sa Subrintendèntzia Archeologia, bellas artes e paesàgiu pro sa tzitade metropolitana de Casteddu e sas provìntzias de Aristanis e Sud Sardigna, a donadu deretu sos frutos suos. A pagas dies dae su cumintzu de su cantiere, chi est interessende unu terrinu in sa parte meridionale de su situ archeològicu in su comunu de Crabas, sunt essidos a campu unu bustu e àteros frammentos de duas istàtuas noas, ambas identificadas comente a “pugiladores de su tipu Cavalupo” pro su grandu iscudu mujaditu postu in dae in antis su truncu, belle uguales a sas duas isculturas agatadas a pagos metros de distàntzia in su 2014 e como espostas in su Museu tzìvicu de Crabas.

“Un’iscoberta etzetzionale – at decraradu su Ministru de sa Cultura, Dario Franceschini – a sa cale nd’ant a sighire unas àteras, a cunfirma de s’impinnu significativu de su Ministeru in custu giassu istraordinàriu, chi non tenet paragone in su Mediterràneu. S’agatamentu de  àteros duos Gigantes, difatis, acontesset a prus pagu de un’annu dae sa nàschida de sa Fundatzione chi bidet su MiC, su Comunu de Crabas e sa Regione Sardigna impinnados in sa valorizatzione de una de sas testimonias prus mannas de un’antiga tziviltade mediterrànea. De custa manera, duas prendas noas s’agiunghent a custu grupu istatuàriu chi est atirende  s’atentzione de su mundu intreu”.

 “Mentras sos bucones piticos e mèdios benint in manera cuotidiana postos in evidèntzia, documentados in su terrenu e recuperados – at decraradu sa Subrintendente, Monica Stochino – sos duos blocos, pro more de su pesu e de sa mannària, ant a tènnere bisòngiu de tempus pro èssere liberados dae sa terra  chi los imbòligat . S’acatamentu – agiunghet Stochino– prèmiat sa costàntzia e sa balidesa de su mètodu archeològicu de esploratzione progressiva a traessu de fases de sondàgiu preliminare e de iscumbatas sistemàticas, medidas e esecutadas in sos modos e in sos tempos cunsentidos dae sa disponibilidade de sas risursas e dae s’elaboratzione parallela de sos progetos de iscavu, restàuru e espositzione de sos repertos e de valorizatzione de su giassu”.

Sa Fundatzione Mont’e Prama, presidida dae Anthony Muroni, est naschida su 1 de trìulas 2021 cun sa firma de s’atu costitutivu de su Ministru Franceschini, de su Presidente de sa Regione Autònoma de sa Sardigna, Christian Solinas, e de su Sìndigu de Crabas, Andrea Abis. Su Ministeru de sa cultura at cunferidu a sa Fundatzione su cumplessu de sas isculturas de Mont’e Prama; s’immòbile realizadu in funtzione de s’ampliamentu de su Museu Archeològicu de Crabas; s’àrea archeològica de Tharros, sa Turre de Santu Giuanne e s’ipogeu de Santu Sarvadore.

 “Progetto finanziato con l’Avviso Pubblico IMPRENTAS annualità 2021-2022”

S’atteru manzanu, bi est bistada un’accorrada importante meda de su comidadu de sa provintzia de Nugoro, de s’ordine e sa seguresa pubbrica, cun sa presidentzia de su Prefettu de Nugoro Dionisi, a sa cale ant partetzipadu sos cumandantes provintziales de sas Fortzas de s’ordine, e de sa polizia de sos cartzereris Antoni Galati. S’argomentu printzipale est bistadu un’attera borta cussu de s’emergentzia chi bi est in sa presone de Badu e’ Carros, una chistione custa, chi est dimandande interventos chi si leant tottu paris.

Respundinde a s’imbiu de s’Esercitu po controllare sa presone dae sa parte de fora, si ispettant interventos puru da parte de s’amministrassione de sa Presone. Su provvedidore at isboddiadu tottu sos particulares de s’imbiu intro de pagu tempus, in Sardigna de 71 agentes mascros,21 feminas e 34 arrezzentes, chi arrivant dae sos cursos
chi sunt finidos dae pagu.

Su segretariu generale de sa Uil Pa Polizia de sas Presones de sa Sardigna, Migheli Cireddu, at faeddadu de sa desemplada assione leada dae su Prefettu Dionisi, chi at collaboradu meda cun su Provvedidore Galanti, po i sfidare sa situassione cun meda detzisione. Bell’e gai, Cireddu at evidentziadu chi s’imbiu de personale nou, est solu unu signale positivu, no est sa solutzione deffinitiva, ispetzie si cunsideramos sos pensionamentos chi ant esser fattos in pagu tempus.

Su personale de sa polizia de sa presone, in manera particulare in Nugoro e Tattari, sighint a tribagliare in manera precaria, cun orarios de tribagliu longos meda e paga claresa de su controllu. Cireddu at nadu puru chi bi est s’abbisonzu de torrare a ordimizare su tribagliu e de interessare de pius sos sindacados in custu processu, in manera chi sas intetziones bonas de sas istitussiones si potant traduire in assiones e mesorias beras.

S’impignu de onzi die, de su cumandu regionale e de su Prefettu, est appretziadu meda, ma est urgente chi si passet dae sas ideas a sa pratichesa,interessande sos de sos sindacados in s’ordimizu de su tribagliu. Solu in custa manera si at a podere iscansare chi carchi derettura e cumandante, mancari tenzant sas menzus intentas, sigant a
faghere dannos mannos a livellu logale.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22