Sos istudiantes, acumpangiados dae sos dotzentes issoro e acumpangiados dae sas guàrdias munitzipales, in custas dies sunt andados totu paris a su campu isportivu comunale de  “Is Arranas” pro aparitzare un’initziativa chi li faghet meda onore. Sos istudiantes òmines e fèminas s’ant donadu su càmbiu in unu percursu a istafeta, pighende parte cun grandu cuntentesa e brègiu a custu avenimentu isportivu, a su cale fiant presentes finas sos babbos e insegnantes chi faghiant su tifu pro sos fìgios e pro sos iscolanos issoro.

S’ocasione est istada su progetu de educatzione tzìvica “Cursa contra su fàmene”, un’initziativa isportiva e de solidariedade, promòvida cada annu in sas iscolas italianas de “Azione contro la fame” e patrotzinada dae su CONOS. A custa initziativa ant chèrfidu leare parte peri sos piseddos e sas piseddas de s’Istitutu Cumprensivu de Tertenia.

In Itàlia sunt prus de 1200 sas iscolas primàrias e segundàrias de primu e de segundu gradu chi, paris cun noighentos dotzentes moderadores, ant seberadu de partetzipare a  un’eventu de sensibilizatzione e de isport chi, dae cando est nàschidu at interessadu  prus de sete milliones de istudiantes de in prus de 28.000 iscolas in totu su mundu. Ocannu sunt istados 120.000 sos istudiantes, de prus de 450 Istitutos cumprensivos, chi pròpiu in custas dies sunt leende parte a sa manifestatzione isportiva de solidariedade, in 82 tzitades italianas.

A in antis de is cumpetitziones isportivas in su campu de Is Arranas, sos istudiantes ant sighidu unas cantas oras de de letzione fatas dae sos  espertos de Azione contro la Fame chi ant allegadu de sas càusas de su fàmene e de sas cunsighèntzias suas. Si tratat de unu male chi corfit 811 milliones de persones in su mundu. Ma sa sensibilizatzione non s’est firmada in sas classes iscolàsticas, difatis, sos pitzocos, a pustis de sas oras de formatzione, ant retzidu su “passaportu solidale” cun su cale ant pòdidu interessare e motivare peri sos familiares e amigos issoro subra de sos temas afrontados in àula.

 “Progetto finanziato con l’Avviso Pubblico IMPRENTAS annualità 2021-2022”

Si est custituida in su notaju sa Delegassione po Poderare sa naschida de sa IGP porcheddu de Sardigna, e si est assemidada in manera uffitziale sa Delegassione Iscentifica, chi in sa prima assortida, fatta in Macumere, in s’agentzia de Contas, su 15 de Abrile, at tribagliadu po approntare, medas puntos de su regolamentu de produssione de custa saporitesa totta sarda.

S’intentu, preparare sos documentos chi serbint de presentare a sa Commissione Europea po alcansare su riconnoschimentu de s’arrennomini IGP e faghere naschere una delegassione chi tenzat commente faina printzipale cussa de creare un’unione de sos pastores, masellajos e sos trasformadores de s’eccellentzia sarda, chi potant ordiminzare una filera e dare unu fentomu balidu a su mercadu, po tottu cussu chi appartennet sas fases de pesadura e de trassa de sos porcheddos chi teppent andare a su mercadu.

A sa mattessi manera,bardare sa produsssione locale sarda dae su periculu de battire importassiones chentza controllu perunu, e duncas tutelare s’issida de su prodottu. Unu arminzu balidu puru po sos consumadores, chi ant podere tennere unu trattadore chi potat garantire supra su rispettu de unu regolamentu de produssione. Fases importantes meda, cussas de sa naschida de sas duas delegassiones.

Importante meda at essere sa retza de sos sardos in Italia e in su mundu: su motivu de sa presentzia in sa delegassione de Bustianinu Mossa, presidente de sa Fasi, sa retza de sos corriglios sardos in Italia.”Sos emigrados” si dant itte faghere in cust’intentu commente consumadores,sustenidores,ambasciadores, narat Mossa. Semus 2,5 miliones sos sardos fora de sa Sardigna, ispartinados in tottu su mundu.

Solu in Italia sa Fasi contat casi 30.000 iscrittos, in 68 delegassiones presentes in 12 regiones de s’Italia. Sa pius a mesudie est Ciampino. Su tzentru e su norti de s’Italia sunt su puntu de arribu menzus de operajos, pastores,sordados e istudiantes ligados in manera chi non si podet isligare dae sa cultura sarda chi prima de tottu est sa cosa de mandigare. Esist commente una venerassione de su porcheddu. E difattis partizas sunt sas initziativas chi tenent commente base custu prodottu pittitteri.

Tenimos po custu un’istruttura de negossiu de produttos de calidade funguda, a sa cale si diritzant sos sardos emigrados.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22