Comente ischimus totus sa Sardigna est sa pàtria de su muralismu: difatis in medas biddas s’agatant sos murales prus galanos de totu su mundu. Si tratat de una forma artìstica nàschida comente espressione creativa lìbera dae sos movimentos de protesta, chi unit balore a s’estèticu e a sa bellesa peri su valore sotziale. Custas pinturas pro su prus sunt esecutadas dae prus persones e espressant sos isperos, su malistare, sas protestas e sa vida fitiana de una comunidade. Sas tècnicas impreadas dae sos muralistas sardos sunt simpres. Si tratas difatis de normales vernitzes a abba pro internos: de cunsighèntzia sos murales coitant a si ruinare e pro custu ogna tantu benint torrados a restaurare. Ma sunt sas comunidades a seberare si tocat a los torrare a asseliare opuru si a s’imbesse si lassat iscumpàrrere a bellu a bellu. Sos istiles sunt medas: andant dae s’impressionismu a sa pintura naif, dae su realismu a s’iperrealismu.
Sos murales prus famados s’agatant in 4 biddas: Orgòsolo, Bidda Mara, Santu Sperau e Serramanna. Su primu murale de sa Sardigna fiat istadu pintadu in Orgòsolo in su 1969 dae Dioniso, grupu anàrchicu milanesu. Dae tando sas pinturas muràrias fiant aumentadas non petzi in custu tzentru ma fintzas in àteras biddas. In su 1975, in ocasione de su 30° anniversàriu de sa Liberatzione, un’insegnante senesu de s’iscola mèdia e sos dischentes suos nd’aiant realizadu àteros; posca aiant dadu su contribuidu grupos issoro peri artistas locales. Custa detzisione aiat portadu medas comunos a cummissionare a artistas locales murales pro allichidire sas fatzadas de sas domos de sas biddas.
Ma cale est su murale prus longu de sa Sardigna? Su murale prus longu de sa Sardigna s’agatat a Assèmini: est prenu de colores e est mannu 65 metros. Est istadu fatu dae s’artista Rosaria Straffalaci. Custu murale si mutit “Fabula”. Collocadu a su cumintzu de su muru b’est una cadrea manna in istile sardu: mannu e coloradu, est su puntu de bista mègius pro ammirare in prenu sa bellesa de s’òpera, chi est istada inchingiada in su 2017.
“Progetto finanziato con l’Avviso Pubblico IMPRENTAS annualità 2021-2022”