Sunt istados secuestrados dae su Corpus Forestale, in su sartu de Biddaramosa, 342 kg de cannabis/marijuana chi si postos in su mercadu de sa droga diant àere frutadu belle 1.400.000 èuros.
Sunt istadas acapiadas duas persones, N.C de 24 annos e A.M de 23 annos, allevadores residentes in Biddaramosa, e àteras duas persones sunt istadas denuntziadas a pee lìberu. Est su bilantzu de s’operatzione portada a in antis dae su Corpus Forestale – Ispetoradu de Casteddu, concruida a pustis de un’atividade investigativa cumplessa chi at bidu protagonista su Nùcleu Investigativu de su Corpus Forestale. S’operatzione s’incuadrat in s’atividade istitutzionale de controllu de su territòriu e presìdiu de sa legalidade in àmbitu urbanu.
A s’interventu ant partetzipadu 30 agentes Forestales suportados dae su Nùcleu artifitzieris e dae su Nùcleu Tzinòfilos de sa Politzia de Istadu, in prus su Nùcleu Tzinòfilos de s’Arma de Carabineris. S’operatzione, cuntzentrada in duas aziendas zootècnicas, at permìtidu de agatare duos depòsitos mannos de droga giai traballada, sicada e cunfetzionata in sacos de belle 1 kg. Su primu depòsitu, individuadu agatadu a presu de un’azienda agrìcula in localidade “Caddaxiou” est istadu iscobertu in un’olivàriu. Sos incuirentes in deretura ant fatu un’ispetzione iscoberende sa droga in intro de un’istèrgiu de birdurèsina interrada. Dae sa tzisterna sunt istados recuperados 230 sacos prenos de marijuana, pro unu totale de 210 kg. Su segundu depòsitu individuadu dae sos investigadores durante s’inghesta e sa percuisitzione, fata in localidade “Domos Morgano”, fiat un’acorru ricavadu una perca in mesu a una perdàile in intro de su terrenu de s’azienda. In custu logu sunt istados cuberados 28 sacos dae plàstica prenos a intipu de marijuana, prus a mancu 132 kg. Paris cun sa droga est istada agatada e secuestrada s’atretzadura impreada pro sa traballadura e su cunfetzionamentu de sas doses.
“Progetto finanziato con l’Avviso Pubblico IMPRENTAS annualità 2021-2022”