Prus de 100 milliones de èuro de investimentos, 33 progetos e 18 sugetos atuadores. Sunt sos nùmeros printzipales de su Pranu integradu urbanu nou de sa Tzitade Metropolitana de Casteddu. Interessados totus sos 17 Comunos de s’àrea ampra a inghìriu a su cabulogu, e in de su masterplan b’at sa firma de s’architetu de su paesàgiu de fama internatzionale João Nunes.
“Amus giutu dae in antis unu traballu cumpartzidu e partetzipadu dae totu sos sugetos interessados – at naradu su sìndigu metropolitanu Paolo Truzzu – est unu pranu integradu urbanu modernu, solidale e sustenìbile chi andat a avantàgiu de totu sa colletividade. Pro fàghere esèmpiu pro Casteddu sunt prevìdidos progetos chi includent s’assentu de sos canales de Terramaini e La Palma, sa creatzione de percursos birdes intre su Mercadu Civico de San Benedetto e su Parcu de Terramaini e sa ricualificatzione de su Mercadu de San Benedetto etotu. A su matessi modu, pro ogni comunu sunt istados individuados sos interventos istratègicos de valorizatzione e amodernamentu pro favorire s’isvilupu econòmicu, sotziale, culturale e isportivu, fintzas pro mèdiu de solutziones ecològicas e de connessione tra sos territòrios”. Sa punna est cussa de isvilupare un’aneddu sustenìbile intre sos diferentes tzentros de sa Tzitade metropolitana.
Su pranu punnat mescamente a creare una rete de infrastruturas birdes e de connessione intre sas àreas ùmidas, ma fintzas una rete de servìtzios culturales e isportivos pro mesu de s’innovatzione de edifìtzios e ispàtzios giai chi giai esistint.
Segundu un’òtica de rispàrmiu e innovatzione tecnologica, ant a èssere ogetu de unu progetu de megioru energèticu medas istruturas iscolàsticas, isportivas e sos mercados tzìvicos
Sos interventos ant a interessare su 15% de su territòriu metropolitanu, e fintzas sos residentes. Sas risursas econòmicas, uguales a 101 milliones, ant a èssere destinadas pro su 60% a sas infrastruturas sotziales, produtivas e isportivas, chi ant a inclùdere 19 progetos a sos cales sunt destinados prus de 60 milliones de èuros. A sas infrastruturas ambientales e risursas ìdricas at a andare su 24%, uguale a prus de 24 milliones e mesu de èuros, dae partzire intre 7 progetos. Su chi abarrat 16%, uguale a casi 16 milliones de èuros, at a finantziare 7 interventos chi ant a pertocare sos trasportos.
“Progetto finanziato con l’Avviso Pubblico IMPRENTAS annualità 2021-2022”