Cara a Archeologika 2022: chenàbura 4 e sàbadu 5 martzu in Crabas duas dies de eventos culturales e sientìficos dedicados a s’istadu de s’archeologia in Sardigna e a sas prospetivas suas de valorizatzione a livellu internatzionale.
S’annùntziu est de assessore regionale a su Turismu Gianni Chessa: “Archeologika 2022 s’at a acumprire in cabudanni in su Bastione de Saint Remy a Casteddu”. Su Presidente de sa Fundatzione Mont’e Prama Anthony Muroni at agiuntu: “Sa missione de sa Fundatzione est fàghere de acàpiu intre istitutziones pùblicas, mundu de sa chirca, assòtzios, sugetos privados e operadores culturales pro atziones comunas e non prus disarticuladas”
Crabas, sa bidda de sos Gigantes de Mont’e Prama, est sa prima de sas tapas de apresiamentu a Archeologika 2022, sa segunda editzione de su progetu pensadu dae s’assessoradu de su Turismu de sa Regione Sardigna pro promòvere a livellu natzionale e internatzionale s’imàgine de sa Sardigna e de su mannu patrimòniu suo archeològicu.
S’apuntamentu est pro chenàbura 4 e sàbadu 5 martzu, acanta su tzentru polifuntzionale de sa bidda de s’istàinu, ue, paris a espertos e istudiosos, b’at a èssere fintzas sos rapresentantes de sas istitutziones, a cumentzare dae s’assessore regionale de su Turismu Gianni Chessa. Fintzas s’editzione de su 2022 de Archeologika tenet su patrotzìniu de su MiC e sa collaboratzione importante cun sas subrintendèntzias archeològicas, sas amministratziones comunales interessadas e su sistema de sas impresas locales.
A Cabras b’at a èssere pro custu fintzas su rapresentante de su Ministeru de sa Cultura pro sa Sardigna, sos Subrintendente de Archeologia, bellas artes e paesàgiu pro sa tzitade metropolitana de Casteddu e pro sas provìntzias de Tàtati e Nùgoro e su presidente de s’Anci regionale.
Sas duas dies de eventos culturales e sientìficos rapresentant unu momentu importante fintzas pro sa Fundatzione Mont’e Prama: su 5 martzu s’at a aposentare a manera ufitziale sa cummissione chi at a tènnere su còmpitu de seberare su nùmene de su diretore de sa Fundatzione.
SU PROGRAMMA:
Chenàbura su 4 de martzu
Si cumentzat a sas 15.30, cun unu cunvegnu chi at a bìdere sa partetzipatzione de unas cantas sotziedades de gestione de sos giassos e de sos logos de sa cultura de sa Sardigna. Un’ocasione pro acrarire bonas pràticas, fàghere propostas, individuare percursos istratègicos in sa gestione de sos giassos, no ùrtima sa creatzione de acòrdios de rete e sa collaboratzione intre sos giassos in su panorama regionale. Introduit sos traballos Anthony Muroni (Presidente de sa Fundatzione Mont’e Prama). Intervenent Cristiano Erriu (Diretore de su Tzentru Servìtzios pro sas Impresas), Sara Fadda (Sotziedades de Gestione Sémata Sotziedade Cooperativa) e Miriam Spano (Sotziedade de Gestione Barlares s.a.s).
A sighire, a sas oras 17.30, b’at a èssere su cunvegnu de su tìtulu “Bioarcheologia a Mont’e Prama, un accostamento multidisciplinare”. Intervenent Salvatore Rubino, Luca Bonoroli, Raimondo Zucca e Vittorio Mazzarello.
Sàbadu su 5 de martzu
A sas 10, est in programa s’aposentametu de sa Cummissione Sientìfica de sa Fundatzione Mont’e Prama cumposta dae Christian Greco, Fulvia Lo Schiavo, Gert Burgers, Simonetta Angiolillo e Pierpaolo Forte. Sa cummissione at a èssere mutida a valutare sas 24 candidaduras intre sas cales at a èssere seberadu su diretore nou de sa Fundatzione.
A sas 11 atopu cun su grandu cunvegnu de presentada de Archeològica 2022. Intervenent Andrea Abis (Sìndigu de Crabas), Gianni Chessa (Assessore regionale de su Turismu), Patricia Olivo (Segretàriu Regionale de su Ministeru de sa Cultura pro sa Sardigna), Monica Stochino (Subrintendente Archeologia, bellas artes e paesàgiu pro sa tzitade metropolitana de Casteddu), Bruno Billeci (Subrintendente Archeologia, bellas artes e paesàgiu pro sas provìntzias de Tàtari e Nùgoro), Anthony Muroni (Presidente de sa Fundatzione Mont’e Prama), Emiliano Deiana (Presidente Anci Sardigna), Maurizio De Pascale (Presidente de sa Càmera de Commèrtziu de Casteddu e Aristanis), Alberto Moravetti (Presidente designadu de su Comitadu Sientìficu de sa Fundatzione Mont’e Prama), Emanuele Lilliu (Presidente de sa Fundatzione Barùmini Sistema Cultura) e Giorgio Murru (Diretore Sientìficu de Archeològica 2022).
“Progetto finanziato con l’Avviso Pubblico IMPRENTAS annualità 2021-2022”