A pustis de àere furadu sa casseta de sas ofertas, est istadu iscobertu dae su pàrracu chi l’at postu fatu in sos caminos de Àrbus. S’òmine,disocupadu cun denùntzias pretzedentes a càrrigu suo, est resèssidu a si fuire, ma est istadu reconnotu e denuntziadu a sos carabineris de sa caserma locale, chi l’ant denuntziadu pro intentada fura agravada.
Su furone est un’òmine de 39 annos. Custu su contu de su chi est acontèssidu. Su sero de s’11 de freàrgiu, aprofitende de s’ausèntzia momentànea de su prèide de Santu Sebastianu Màrtire, nd’at boddidu su bote de sas ofertas cun a intro 50 èuros. Su satzerdote però, torradu dae sa sacrestia, dd’at bidu e dd’at postu fatu, custringhende su furone a abbandonare su dinare furadu. S’òmine est istadu connotu dae su pàrrocu e fintzas dae àteros passantes.
Duncas est bastadu pagu a sos carabineris chi a pustis de àere regortu unas cantas testimoniàntzias ant depositadu sa denùntzia presentada dae su satzerdote aristanesu residente a Àrbus e pàrracu de sa crèsia de Santu Sebastianu Màrtire. Sos Carabineris de s’Istatzione locale l’ant diferidu in istadu de libertade a sa Procura de sa Repùblica de su Tribunale de Casteddu, pro intentada fura agravada.
Sos òmines de s’Arma ant atzertadu chi su disocupadu, bia sas oras 21,00 de s’11 freàrgiu coladu, a pustis de èssere intradu a iscusi in crèsia, nde at leadu su dinari de sas ofertas. Su prèide, chi in cussu momentu fiat in sacrestia, at intesu calicunu sonu e s’est incaradu pro bìere ite fiat sutzedende. Est tando chi at bidu s’òmine fuendesinde cun sas ofertas in manos e dd’at sighidu fatu fatu de sos camineddos impedrados de sa bidda, custringhende•lu a nche fuliare a malucoro sa casseta cun su dinari. S’òmine pensaiat de èssere resèssidu a si la sarbare, ma est istadu reconnotu dae su prèide e dae sos passantes. Pro sos carabineris est istadu unu giogu a dd’agatare e a ddu denuntziare.
“Progetto finanziato con l’Avviso Pubblico IMPRENTAS annualità 2021-2022”