Su 16 de freàrgiu passadu sa Giunta regionale Sarda at aprovadu sa delìbera proposta de s’assessora a sa Massaria Gabriella Murgia; sunt operativas is diretivas de atuatzione de is interventos de agiudu cun 7 milliones e 100 milla èuros.
“Est unu primu agiudu, cuncretu e pretzisu – at nado su presidente de sa Regione, Christian Solinas – pro unu setore chi prus de àteros est paghende is aumentos de is matèrias primas e de is costos pro s’energia. Totu su sistema pastorale sardu est patende is efetos graes meda de un’emergèntzia sanitària e econòmica chi sa Giunta est cumbatende cun mesuras pretzisas e miradas. Semus e amus a èssere semper acanta a is pastores nostros e a totus is massajos, chi pedint prus seguresa pro fraigare unu benidore de isvilupu. Amus a sighire a fàghere sa parte nostra finas a sa fine, ma custas seguresas depent lòmpere pro more de un’interventu istraordinàriu de s’Istadu chi pongat in contu fintzas is costos de sa cunditzione nostra de èssere un’ìsula.”.
Sa Giunta cun custu dinare bolet lòmpere a is siendas zootecnicas chi allevant berbeghes e crabas e chi sunt malàidas pro neghe de sa blue tongue, chi in su 2021 ant pèrdidu bestiàmene. Cunforma a is datos epidèmicos registrados de s’Osservatòriu epidemiològicu veterinàriu regionale, a su 31 de mese de idas de su 2021 in Sardigna si contaiant 2812 focolaios ativos, 12 suspetos e 458 estintos in totu su territòriu, cun 116.205 casos atzertados e 39.060 animales mortos pro neghe de sa maladia. In totu at pertocadu 3.270 allevamentos paris a 1.180.352 animales.
“In is siendas seis de sa blue tongue – ispricat s’assessora Murgia – is autoridades sanitàrias ant impostu totu is mesuras sanitàrias restritivas cunforma a sa normativa comunitària e natzionale pro prevenire s’ispartzinamentu de sa maladia. Ma si is mesuras tenent un’aplicatzione manna, est a beru chi in custas siendas is cunditziones de su benèssere de is animales non sunt bonas, medas sunt is mortes e sa produtzione de is animales chi non morint est bàscia. S’agiudu punnat a indennizare is pastores pro sa pèrdida de animales mortos pro neghe de sa maladia e pro sa produtzione mancada, e pro is costos sanitàrios e de alimentatzione prus artos, afrontados pro more de s’ispartzinamentu de sa maladia e de is mesuras sanitàrias.
“Progetto finanziato con l’Avviso Pubblico IMPRENTAS annualità 2021-2022”