S’intìtulat “Muti forte” su branu giai trasmìtidu in sas retes sotziales a Paschighedda e como disponìbile in Youtube e in sas butegas digitales, suportadu dae unu vìdeu realizadu in sos logos prus caros a Manuela chi bivet tra Roma e Triei.
Su tìtulu de sa cantzone ponet a craru totu sa profundidade de s’ànimu umanu espressadu dae Manuela Mameli in su petzu nou, una proa musicale balente e balentiosa chi tocat sos sentimentos e donant unu signale de bighinàntzia: “in su momentu chi totu paret andare male — narat Manuela — nos donat s’isperu pro sighire a andare a in antis. Custa cantzone est un’innu a s’amighèntzia e a s’amore”.
In sa cantzone Muti forte sa cantante sarda at postu a pare unu contu musicale acanta amighèntzia e famìlia sunt cosas de importu mannu.
Su branu est essidu s’8 nadale coladu in duo cun Alessio Zucca, posca a Paschighedda in sos canales retes sotziales in cuartetu cun Alessio Zucca a su pranu, Matteo Marongiu a su bassu e su frade de Manuela, Giovanni Mameli a sa bateria, acumpangiadu dae su vìdeu inèditu chi at a essire in sos meses sighentes.
Trieddina de nàschida, 33 annos, sa boghe de Manuela Mameli at ammaliadu su pùblicu in sos teatros de mesu mundu: Tzina, Russa, Sibèria e Crimea. In totu sas esibitziones suas e a sos progetos seberados dae issa, Manuela est resèssida a fàghere connòschere s’ìsula nostra e mescamente sa mùsica isulana. Sos ùrtimos traballos discogràficos “Is Goccios po sa Nàschida de Gesu Cristu” e Rosa Galana (2020) s’isvilupant a inghìriu a sa mùsica traditzionale, a sos sentimentos e a sa religiosidade de sa Sardigna, temàticas declinadas in vìdeu chi ant tocadu su primadu de visualizatziones in Youtube. E posca ancora collaboratziones cun musitzistas comente a Luca Faraone, Kevin Leo, Luigi Lopez, Paolo Carrus, Massimo Satta, Andrea Dall’Olio Franco Melis, traballos subra de sa mùsica populare chi dda càndidant comente giòvanu interprete intre sas prus interessantes de su panorama isolanu.
“Progetto finanziato con l’Avviso Pubblico IMPRENTAS annualità 2021-2022”