Sa droga arribbaiat a Itàlia atacada in sos istèrgios prenos de binu o a s’internu de sos blocos dae tzimentu impreados comente contrapesos in sas grues.
19 persones de s’assòtziu de criminales ispetzializados in su tràficu de droga intre Ispagna, Piemonte, Sardigna, Lombardia, Làtziu e Abrutzu sunt istadas acapiadas oe dae sos carabineris de su Nùcleu investigativu de Casteddu cun s’operatzione ‘Eldorado’,
Sos capos de s’organizatzione s’agataiant a Torinu, logu acanta sunt istadas arrestadas oto persones, intre custas b’aiat tres òmines cunsiderados sos intermediàrios chi batiant sa droga dae sa Penìsula Ibèrica, faghiandela arribbare a Torinu e posca, gràtzias a sa collaboratzione cun sos sardos, la faghiant lòmpere a Sardigna.
Segundu su chi nd’est essidu a campu dae sas indàgines de sos carabineris, ogna duos meses dae s’Ispagna beniant importados 1.500/2.000 chilos de droga, e de custos 500 fiant destinados a su mercadu sardu.
Durante sas indàgines, difatis, in su freàrgiu de su 2017, sos carabineris ant iscollidu unu càrrigu de 800 chilos de hascisc. Sa droga fiat cuada in sos contrapesos de una gru destinada a un’imprendidore edile de Casteddu. 11 sas persones arrestadas oe in Sardigna, 10 in Casteddu e una in Aristanis. S’inghesta est partida in su 2016 e est acabbada in su mese de santandria de s’annu cun s’operatzione Icres, de cale s’operatzione Eldorado de oe est unu sighimentu.
Fiant tres sos casteddajos chi in Sardigna gestiant s’ispatzu de hascisc e cocaina chi arribbaiat dae s’Ispagna. Fiant custos chi aiant sos cuntatos cun sos torinesos faghende arribbare in s’Ìsula 500 chilos de droga ogni duos meses. Sos càrrigos beniant posca cuados in domo dae minorennes intzensurados, posca recuperados e ispatzados. Durante sas indàgines sos carabineris de su Nùcleu investigativu de su cumandu provintziale de Casteddu ant secuestradu 1.200 chilos de hascisc, 5,1 kg de cocaina, 6,5 kg de marijuana, 20 grammos de eroina e 68 matigheddas de cannabis ìndica.
“Progetto finanziato con l’Avviso Pubblico IMPRENTAS annualità 2021-2022”