Is 270 milliones de su PNNR destinados a sa sanidade sarda ant a èssere investidos in s’assistèntzia e in sa cura de is sardos. Dd’at naradu su presidente de sa regione Solinas.
13 ispidales de Comunidade e 50 Domos de comunidade, e in prus is tzentrales operativa territoriales, est a nàrrere istruturas destinadas a ghiare is tzitadinos e a torrare prus efitziente su donamentu cura. Custu est su chi est prevìdidu in su pranu de sa Regione.
“Semus prontos a investire is risursas postas a disponimentu dae su Pnrr pro sa sanidade e amus a investire finas a s’ùrtimu nìchili pro dare a is sardos servìtzios semper mègius, modernos e pro afortigare in custa manera is curas e s’assistèntzia”. Sunt is faeddos de su Presidente de sa Regione Christian Solinas, narados a is giornalistas a pustis de sa comunicatzione de s’istantziamentu previstu pro sa sanidade sarda in su decretu de su Guvernu, chi istabilit pro s’Ìsula 270 milliones de èuros de risursas. “Si tratat de un’ocasione manna chi nos òbligat a nos impinnare cun totu is fortzas nostra pro more chi custu dinare siat gastadu bene”, at agiuntu su capu de sa giunta.
De su matessi tenore is faeddos de s’assessore a sa Sanidade Mario Nieddu, chi at naradu: “In bista de s’istantziamentu prevìdidu dae su Pnrr amus cuncordadu unu pranu pro su territòriu cumpartzidu cun totu is portadores de interessu. Semus istantargende pro sa sanidade sarda unu modellu modernu e sustenìbile chi andat prus addae de su dualismu ispidale-territòriu, chi siat prus a presu a is bisòngios de su tzitadinu e a is netzessidades suas. Unu sistema capatzu de acumpangiare su malàidu in is percursos de cura e assistèntzia su prus adeguados possìbile”.
Sunt prevìdidos 13 ispidales de Comunidade e 50 Domos de comunidade. A custos s’agiunghent is tzentrales operativa territoriales, est a nàrrere is istruturas chi tenent su còmpitu de ghiare is tzitadinos e rèndere prus efitziente sa pigada in càrrigu de is malàidos. Custu est su chi est prevìdidu in su pranu de sa Regione.
“Progetto finanziato con l’Avviso Pubblico IMPRENTAS annualità 2021-2022”