Giovanni dd’ant postu a nùmene, su fìgiu de una còpia de Nùgoro. Est su primu nàschidu de su 2022 in su naschidòrgiu de s’Ispidale Santu Frantziscu.
Est nàschidu bintisete minutos a pustis de su tocu de mesunote Giovanni est su primu nugoresu de s’annu 2022. S’ eventu alligru est acontèssidu in su puntu nàschida de s’Ispidale Santu Frantziscu de Nùgoro. Giovanni (fìgiu de una còpia de giòvanos de Nùgoro), istat bene e at pesadu 3 chilos e 300 gramos.
«Su repartu de Ostetrìcia de s’ispidale Santu Frantziscu de Nùgoro — cummentat su Diretore de s’Unidade Operativa, Dot. Antonio Onorato Succu — at serradu su 2021 cun belle 800 nàschidas, pro esatesa 794: sunt medas, si cunsideramus su calu demogràficu drammàticu chi interessat s’Itàlia e s’Europa, non pro àteru in unu cuntestu in ue sa Sardigna, chi tenet s’ìnditze de natalidade prus bassu de su Continente Betzu ».
Duncas si tratat de una noa bona chi donat fintzas ispetu bonu pro su benente, mancari non bastat custu ebbia pro nàrrere chi semus a dae in antis de unu càmbiu de tendèntzia pro su chi pertocat sas nàschidas.
«Sos chi sunt naschidos in s’istrutura nostra s’annu passadu — sighit Succu — sunt belle totus de su logu, cun una pertzentuale de extra-comunitàrios bassa meda respetu a sos àteros puntos nàschida de sa Sardigna, pro esèmpiu Terranoa e Casteddu. Su naschidòrgiu nugoresu sighit a investire meda pro su partu naturale, gràtzias a sas capatzidades bonas de sas ostètricas e de s’iscuadra nostra, de su rispetosa de sa fisiologia e de sa naturalidade de sa nàschida in seguridade».
S’ùrtimu nàschidu de su 2021, imbetzes, benit dae unu partu ispontàneu, e est un’omineddu de 3 chilos e 250 grammos, primu fìgiu de una còpia de Ollolai.
© RIPRODUTZIONE RISERVADA
“Progetto finanziato con l’Avviso Pubblico IMPRENTAS annualità 2021-2022”