Cuntzertos de Annunou chi brincant, mercadeddos de Nadale chi no aberint e sìndigos chi faghent ordinàntzias pro limitare is is festas: in Itàlia is contàgios de Covid-19 aumentant, gasi comente sa timòria chi durante is dies de festa aumentent is ammuntonamentos, mescamente pro s’ùrtima note de s’annu.
Is artistas sunt torra in dificultade pro more de custas limitatziones noas contra su covid e torrant a èssere sena traballu.
Cuntzertos rimandados a data de istabilire. Sas restritziones pro su mundu de s’ispetàculu in totu s’Itàlia finas a su 31 de ghennàrgiu sena mesuras de tutela pro totu is traballadores de su setore.
Artistas meda ant bidu annullare su cuntzertu de fine annu, cun paritzos professionistas de su mundu de s’ispetàculu – artistas e traballadores – chi traballat e chi, gràtzias a cussu cuntzertu tirat a in antis pro diversos meses.
Su mundu de s’ispetàculu non cumprendet comente mai, un’àtera bia, is istitutziones e is amministratziones pùblicas apant pigadu de punta su mundu de s’arte e de s’ispetàculu.
Custu mentras is tzentros cummertziales sunt prenos de gente a isticu comente e semper, is partidas a s’istàdiu andant a in anti sena problela e sunt prenas de gente sena mascheredda. Gasi comente is aeroplanos e is naves resurtant prenos de passigeris e una bia arribbados a aeroportu e portu intrant in is postales acanta pro unu bellu pagu de tempus, is persones sunt ammntonadas is unas a pitzu de is àteras in un’ispàtziu gasi istrintu.
Is esèmpios diant pòdere èssere medas àteros. Is artistas si sunt chesciados contra is istitutziones pro custa situatzione, pedende de non discuidare su mundu de sa mùsica, de s’arte e de sa cultura. Primariamente ca acumprint unu ruolu importante meda pro sa sotziedade e pro s’umanidade, dae semper.
Dae pònnere in annotu chi is artistas non tenent iistipèndiu mensile asseguradu comente a meda àtera gente pro sa cale, a sa fine , no at cambiadu nudda, francu sa timoria de s’ismalaidare, comente a totus.
Amus a bìdere si custu setore importante pro s’istòria e sa cultura italiana in is meses imbenientes at a èssere agiuadu.
Attività realizzata col contributo della Regione Sardegna – IMPRENTAS 2020-2021. LR 22/2018, art. 22