Is casteddajos a pustis de sa derrota mala a ingùrtere contra s’Udinese, in sa giorronada benente ant a chircare de cungiare su 2021 faghende carchi puntu contra sa Juventus.
No at a èssere fàtzile a s’impònnere foras de domo in su Juventus Stadium, pro more chi a is piemontesos ddis serbit puntos pro lòmpere a sa zona prus arta de sa classìfica.
Pro is sardos ar a èssere importante bortare pàgina in presse, a cumentzare dae sa gara de campionadu contra is biancu-nieddos.
Sa punna est sa de cungiare cun in bonu modu s’acabbu de custu 2021 chi est andadu male meda, pro regalare una bella satisfatziones a is tifosos sardos.
Is ruju-blu sunt galu delùdidos pro sa derrota contra s’Udinese in sa partida colada tra is muros amigos de s’Unipol Domus. Is biancu-nieddos in una partida giogada male meda dae su Casteddu, ant bìnchidu 4-0. Is giogadores de Mazzarri sunt mutidos a donare una proa manna contra is torinesos, dimustrende torra su caràtere mannu dimustradu in sa coa de s’istajone colada.
No at a èssere fàtzile leare puntos contra is òmines de Allegri, chi sunt bene assentados in is primas positziones de sa classìfica de su campionadu e chi tenent bisòngiu de conchistare puntos pro lòmpere a curtzu de Milan e Inter.
At a èssere unu desafiu difìtzile pro su Casteddu chi, in totus is garas giogadas in Sèrie A, a Torinu at bìnchidu pagu bias. Is sardos ant a afrontare is torinesos sena de Godin e Caseres, bogados a sonu de corru dae su diretore isportivu ruju-blu Capozucca.
Pro su restu sa formatzione non diat dèpere cambiare meda in cumparàntzia s’ùltima isfida, cun Grassi
semper prus mere de su tzentrucampu e Pavoletti cun Joao Pedro prontos a corpire s’aversàriu.
Sa Juventus allenada dae Allegri calat in campu cun sa formatzione tipu – sena Dybala – cun su clàssicu 4-4-2. A Bernardeschi su còmpitu de iscasidare sa còpia de atacu formada dae Kean e Morata.
Attività realizzata col contributo della Regione Sardegna – IMPRENTAS 2020-2021. LR 22/2018, art. 22