S’Itàlia est su paisu de s’annu. No in tèrmines assolutos, ma in cantu a passos a in antis pro su chi pertocat s’economia e sa gestione de su paisu dae una banda, is resurtados isportivos e is resèssidas in su mundu de s’ispetàculu.
Nemos diat àere pensadu chi su paisu nostru poderet tènnere unu tassu de vatzinatzione tra is mègius in Europa, ma mancu chi Matteo Berrettini arribbaret in finale a Wimbledon o chi is Mäneskin poderent bìnchere s’Eurovision. In su fùbbalu cun s’Europeu bintu, cun is 40 medàllias olìmpicas, prus che totu cun una gestione de una situatzione difìtzile meda tra pandemia e crisi econòmica, mègius de àteros. Comente naradu non sunt nùmeros assolutos. S’economia italiana no est sa prima a su mundu. Su dèpidu pùblicu restat mannu meda. Su tassu de disocupatzione est a su 9,2% e est prus artu pro fèminas e giòvanas. Sa poberesa est crèschida in sos annos de sa pandemia. Segundu su Raportu Censis in su 2020 si signalant 2 milliones de famìlias italianas in poberesa assoluta, crèschidas prus de su 100% in 10 annos.
Su prèmiu andat «a su chi est megioradu de prus in su 2021». Sa vatzinatzione cun tassos tra is mègius de Europa est su sinnu prus craru. Pro s’Economist s’Itàlia at traballadu subra de su difetu peus chi tenet: sa «weak governance», su sistema de guvernu dèbile «chi at fatu a manera chi s’Itàlia esseret in su 2019 prus pòbera chi non in su Duamìgia». Naradu dae unu giornale chi aiat definidu inadatu Berlusconi e disegnadu Renzi in una barca chi afundat, est unu grandu cumplimentu chi andat massimamente a Mario Draghi.
S’Itàlia «at achiridu unu primu ministru cumpetente e respetadu in manera internatzionale», seberadu dae una majoria ampra chi est andada addae de is diferèntzias polìticas in su nùmene de is reformas.
Su giornale britànnicu però faghet un’avertèntzia: atentzione a non torrare in dae segus, in particulare si Draghi at a puntare a su Quirinale rinuntziende a Palatzu Chigi. Su restu de s’isport est mutidu a si cunfirmare s’annu chi benit e a sighire sa cursa a is Olimpìades ierriles de Pechinu 2022.
Attività realizzata col contributo della Regione Sardegna – IMPRENTAS 2020-2021. LR 22/2018, art. 22