Su Casteddu no est renèssidu a fàghere mancu unu puntu a Milano. At bìnchidu s’Inter.
In s’Istàdiu San Siro est acabbada 4-0 pro is òmines de Simone Inzaghi cun is gol realizados dae Lautaro Martinez – duos -, Sanchez e Calhanoglu.
A is nieddos-asulos ddi serbiant puntos pro lòmpere primos solos in classìfica brinchende su Milan chi at paregiadu contra s’Udinese e sunt renèssidos a bìnchere.
Su primu gol de s’Inter est lòmpidu a su minutu nùmeru 29 gràtzias a un’iscuta de conca de Lautaro Martinez, chi at brincadu a solu in s’àrea de rigore.
Is nieddos-asulos diant àere pòdidu marcare sa segunda rete cun su matessi argentinu dae is undighi metros – pro more de una farta a dannu de Dumfries – ma su portieri ruju-blu est istadu bravu meda a ddu parare.
Duncas su primu tempus acabbat 1-0. Ma in sa ripresa a su minutu 50’ est bravu meda Sanchez a agatare su 2-0 serbidu dae s’ex giogadore ruju-blu Barella. Su Casteddu no est renèssidu a aderetzare su risurtadu, e pro totu sa partida no est lòmpidu a sa porta de is aversàrios.
Difatis unu cuartu de ora a pustis, is milanesos at fatu su 3-0 cun una iscuta de pee forte a beru de Calhanoglu chi at bogadu sa lana de arangiolu dae s’ingrujada de is palos.
Su 4-0 est istadu realitzadu galu dae Lautaro Martinez cun una dopieta. Su Casteddu at arriscadu de pigare àteras retes puru, ma su portieri Cragno at fatu una pariga de bellas paradas chi ant sarbadu sa porta de is ruju-blu.
Immoe a pustis de custu resurtadu, sa banchita de s’allenadore toscanu Mazzarri est semper prus in perìgulu.
Amus a bìdere ite at a capitare in custas dies, chi su tècnicu at a èssere a sa ghia de is casteddajos, mèrcuris benente, in sa gara de Copa Itàlia contra su Cittadella.
Una gara chi diat serbire a bìnchere pro torrare a andanimare su Casteddu, chi at pigadu is tres puntos s’ùrtima borta contra sa Sampdoria, noe partidas coladas a oe.
Attività realizzata col contributo della Regione Sardegna – IMPRENTAS 2020-2021. LR 22/2018, art. 22