Su Casteddu de Walter Mazzarri otenent unu bonu parègiu in trasferta in domo de su Sassuolo, recuperende pro duas bias su vantàgiu de is meres de domo.

Sa prima parte de giogu est firmada dae Scamacca e dae Keita chi esaltant is tifosos sardos signende una rete cun unu tiru a farrancas in s’àera.

In su segundu tempus s’àrbitru Baroni donat unu rigore a cada iscuadra: Frattesi conchistat su primu e càusat su segundu. Berardi e Joao Pedro trasformant sena problemas dae is 11 metros, portende su resurtadu finale a 2-2.

Custu puntu faghet lòmpere su Sasssuolo a 15 puntos e donat un’atzinnicada fintzas sa classìfica de su Casteddu, chi a pustis de bator partidas pèrdidas de fila de pare colat dae 6 a 7 puntos in classìfica.

A su cumentzu su protagonista est su Sassuolo: sa prima atzione perigulosa de sa partida dda pròvocat Frattesi, chi impinnat Cragno a su 6′, ma s’ocasione prus bella càpitat a Scamacca, chi ses minutos a pustis faddit dae una positzione bona meda.

Su Casteddu s’aprèsiat a su vantàgiu a su 28′ cun una furriada in s’àera de Bellanova respinta però dae Consigli chi pagu a pustis parat finta unu corpu de conca de Ceppitelli. Sa partida s’isblocat a su 37′, cando Scamacca istampat sa difesa istràngia gràtzias a unu passàgiu de Berardi e iscudet sa botza a palas de Cragno: est 1-0.

Is meres de domo non faghent mancu a tempus a festare chi tres minutos a pustis de sa rete de s’avantàgiu Nandez e Keita marcant su parègiu: tiru a su tzentru e bortulada ispantosa chi lompet pagu a suta de sa traversa, portende su resurtadu a 1-1

A su cumintzu de su segundu tempus su Sassuolo cun Berardi befat s’ùrtimu difensore istràngiu, marchende su 2-1 cun unu rigore assignadu dae Baroni a pustis de una ligeresa de Lykogiannis in àrea a dannu de Frattesi.

Est etotu custu, in s’àtera parte de su campu, a corpire a Joao Pedro su tantu chi bastat pro aparisare su contu de is penalidades: dae is ùndighi metros su brasilianu no isbàlliat e gasi su Casteddu agatat pro sa segunda bia su parègiu a pagos minutos a pustis de su gol deretu. A pustis de su 2-2 sa partida s’allughet, Traoré isfiorat su tris in favore is meres de domo, ma su tiru benit firmadu dae Lykogiannis chi posca atzutzuddat cun Berardi.

S’intradu nou Defrel provat sa fortuna dae largu cun una concrusione balente chi però non preòcupat a Cragno. In s’àtera parte de su campu Consigli puru si faghet agatare prontu a parare su tiru deviadu iscutu dae Nandez. Mancari is medas càmbios a s’agabbu de sa partida su resurtadu si firmat a su 2-2, decretende su parègiu tra Dionisi e Mazzarri.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Stefano Oppo, braga de su canottaggiu sardu, at segudadu unu nou sonniu de sa carriera sua paris cun su cumpanzu Gabriel Soares,triunfande in sa porfia de cropa de sos carricos lepios, in s’urtima fase de sa Coppa de Su Mundu de Canottaggiu in Varese.

Sa binchida insoro est bistada unu triunfu, non solu personale, ma puru po s’isport de sa Sardigna, chi si est distintu supra de s’iscena internatzionale. Su primu postu in sa porfia de cropa carricos lepios est bistadu su puntu de arribbu de unu isforzu istravanadu de sos duos isportivos, chi si est bidu meda in su finale de sa porfia, chi che at bogadu s’alenu.

Chentza duda, unu momentu chi non si at podere ismentigare po issos, e unu motivu de arroddu mannu po sa comunidade isportiva sarda.

Stefano Oppo, naschidu in Aristanis, est arribadu a sa chima de sa carriera sua, binchinde s’oro in sa Coppa de su Mundu, paris cun Gabriel Soares, in sa cropa carricos lepios. Sa proa insoro est bistada desamplada,addobbande sos ribales isvizzeros Jan Schaeuble e Raphael Ahumada, in sos urtimos momentos de sa porfia.

Una cumpetissione ammaghiante chi si est congruida cun sa conchista prena de gloria de sa medaglia de oro, mustrande unu arrebattu prenu de emotzione po sas Olimpiades de Parigi de su mese de lampadas de cust’annu.

Una binchida emossionante, accantzada cun d’unu recuberu istravanadu in sos urtimos metros contra s’Isvizzera, chi at dominadu sa porfia po casi tottu sa dura. Semus meda cuntentos, pro itte custa medaglia de oro est po nois unu riscattu beru, at cummentadu Oppo pustis de sa fine de sa porfia.

Commo, po s’atleta sardu, bi ant essere duas chidas de riposu e allenamentos cadrios, aspettande sos Campionados Europeos, chi si ant a faghere in Szeged in Ungheria, dae su 25 a su 28 de Aprile. At essere un’attera occasione po affortigare sa binchida insoro e sighire a essere su menzus de sa Sardigna e de s’Italia in su cataffale internatzionale de su canottaggiu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22