S’Itàlia deludet a Belfast: parègiat 0-0 contra s’Irlanda de su Nord.
Fiat sa serada detzisiva, sa partida chi tocaiat a bìnchere a mala bògia pro si cualificare a su Mundiale in Qatar e evitare duncas su bisu malu de s’isparègiu.
Ma imbetzes cussu bisu malu s’est averiguadu a beru. Is asulos non sunt resèssidos a isprantzare su muru de sa difesa pesadu dae is meres de domo: Insigne, Chiesa e Berardi nche ant proadu, ma non sunt istados pretzisos in is tiros e ant tentu peri pagu fortuna.
In s’àtera partida de su girone s’Isvìtzera comintzaiat a madurare sa vitòria finale de 4-0 e gasi fintzas una sensatzione de discunfiantza at cumintzadu a s’ingendrare tra is pitzocos de su cummissàriu tècnicu Mancini, chi però sunt arrèndidos solu cando s’àrbitru a surbiadu s’agabbu de sa partida. A pustis de àere pèrdidu su primu postu in su grupu C e duncas sa cualificatzione direta, immoe s’ùnicu caminu pro is Mundiales abarrat cussu de s’isparègiu: s’Itàlia at a connòschere is aversàrios imbenientes a fine mese cun su sortègiu de su 26 de onniasantu.
Primu tempus: partèntzia potente de s’Itàlia, is Asulos provant in deretura a pigare su controllu de su campu. Is irlandesos, però, torrant a mòvere in controtacu e Tonali ispendet su cartellinu grogu pro evitare dannos peus. Cun su colare de is minutos s’Itàlia sighit a apretare is aversàrios, ma pagas bias lompet a su tiru. Sa mègius ocasione arribbat a su 37′ cando Insigne resesset a si fichire in mesu a s’àrea aversària cun sa botza in su pee, ma in su prus bellu si dd’allongat tropu e su tiru a efetu finale non imbrollat a Peacock-Farrell. Is Asulos serrant sa primu parte de sa partida dominende su giogu, ma sena gol.
Segundu tempus: S’Irlanda de su Nord non s’acuntentat prus de defensare su parègiu e cumentzat a èssere perigulosa meda a su 50′ cun Saville: s’istamborrada tzentrale benit firmada dae Donnarumma, chi èvitat su 1-0. Chiesa nche proat cun su mancosu suo, ma pecat de pretzisione. S’Isvìtzera raddòpiat contra sa Bulgaria e Mancini torrat a mutire in banchita a Barella, a Insigne e a Jorginho e s’afidat a Belotti, a Bernardeschi e a Locatelli. Peri is Campioni de Europa in càrriga arriscant de si fàghere befare in su finale, in un’essida oras de àrea de Donnarumma chi at mancat sa botza, ma bravu Bonucci a sarvare in sa lìnia de sa porta unu gol chi fiat giai fatu.
Su Cummissàrio Tècnicu, Roberto Mancini, lassat su campu a coddos calados e delusu.
Attività realizzata col contributo della Regione Sardegna – IMPRENTAS 2020-2021. LR 22/2018, art. 22