Custa borta su dischetu no est in favore de s’Itàlia.
Jorginho contra s’Isvìtzera – cun su resurtadu de 1-1 – faddit su rigore chi diat àere asseguradu unu postu in su mundiale chi s’at a giogare in Qatar.
Su regista de sa Natzionale Asula, comente a s’andada, torrat a isballiare unu rigore contra is elvèticos, e e poderat is duas iscuadras cun is matessi puntos in sa parte prus arta de sa classìfica de su grupu C.
Immoe, pro ischrie chie at a serrare comente prima classificada su girone, at a tocare a isetare a lunis, cun s’Itàlia chi at a afrontare s’Irlanda de su Nord in trasferta e s’Isvìtzera at a èssere de iscena in domo contra sa Bulgaria.
Pro s’ora is òmines de Roberto Mancini sunt a in antis a is isvìtzeros in sa diferèntzia retes – +2 pro is asulos – ma custu non donat perunu consolu a is asulos.
Prima de totu at a tocare bìnchere contra s’Irlanda in domo, e abbarrare cun s’origra pitzigada a sa radiolina – comente si faghiat a unu tempus – sintonizados cun su Swissporarena de Lucerna isperende chi is elvèticos ghiados dae Murat Yakin non fatzant medas retes.
Custu sero s’Itàlia, sena medas titolares, est partida unu pagu derenta in is primos binti minutos, cun s’Isvìtzera chi at postu in dificultade sa retroguàrdia asula.
Su vantàgiu de is elvèticos arribbadu a su de ùndighi minutos, frutu de unu contratacu ghiadu dae Okafor cun sighente passàgiu pro Widmer chi at brincadu Donnarumma, est istadu duncas meritadu.
Su gol tenet at istontonadu is òmines de Mancini, cun s’Isvìtzera chi fiat acanta de fàghere rete àteras duas bias. Semper cun Okafor protagonista, chi in un’ocasione at fatu sa barba a su palu.
Su portieri isvìtzeru si depet però arrèndere a unu corpu de conca de De Lorenzo serbidu dae Insigne cun tiru de punitzione.
In su segundu tempus s’Itàlia si trasformat, gràtzias fintzas a is càmbios de su tècnicu Mancini, cun Tonales a su postu de Locatelli e Berardi chi intrat a su postu de Belotti. S’Isvìtzera benit serrada in sa metade campu cosa sua, cun is campiones de Europa capatzos de fàghere cùrrere sa botza a terra a sa lestra.
In su finale, Berardi est bravu a si procurare sa punizione cun Garcia, s’àrbitru in antis lassat sighire, posca torradu a mutire dae su VAR donat su rigore, chi su tzentrocampista de su Chelsea iscudit a pitzu de sa traversa cun sa Natzionale Asula custrinta torrare a bìvere su bisu malu de su 1958 a Belfast, cando non si fiat cualificada pro is Mundiales in Isvètzia.
Attività realizzata col contributo della Regione Sardegna – IMPRENTAS 2020-2021. LR 22/2018, art. 22