Su Casteddu est torradu dae s’Istàdiu Renato Dall’Ara sena mancu unu puntu.
Contra su Bologna at pèrdidu pro 2-0, cun is retes marcadas dae su tertzinu De Silvestri e s’atacante austrìacu Arnautovic.
Su primu tempus tra is duas iscuadras est coladu sena giogadas nen dae s’una e nen dae s’àtera parte. Tzertu, a fàghere sa partida sunt istados is meres de domo, mancari a coa de su primu tempus su giogadore de su Casteddu Marin fiat acanta de fàghere gol.
Ma a su comintzu de su primu tempus sunt istados is òmines de Mihajlovic a agatare sa rete a pustis de un’atzione de Medel cun Arnautovic bravu meda a serbire De Silvestri lassadu sena marcare dae sa defensa casteddaja in àrea de rigore.
Is sardos sunt istados istontonados dae su vantàgiu bolognesu e in àteras ocasiones ant arriscadu sa segunda rete.
In su finale ebbia su Casteddu s’est torradu a fàghere bìdere cun Lykogiannis chi est andadu a curtzu de sa rete, ma su portieri de is meres de domo est istadu bravu meda a parare cun su pee. In s’atzione benente su bolognesu Arnautovic imbetzes no at perdonadu su Casteddu: botza serbida dae su tzentrucampista Sansone a s’austrìacu, chi cùngiat su resurtadu a su 2 a 0.
Immoe is òmines de Mazzarri sunt semper de prus in su fundu de sa classìfica e is garas benentes ant a èssere istragosas meda. Difatis su 6 de onniasantu is ruju-blu ant agatare s’Atalanta de Gasperini, una de is iscuadras prus balentes de su campionadu de Sèrie A.
Tzertu custa isfida s’at a giogare in is muros amigos de s’Unipol Domus, e is casteddajos ant a bòlere mustrare sa gana de gherrare pro bìnchere, cun is tifosos ant a proare a ispìnghere a sa vitòria s’iscuadra issoro.
Tra is bergamascos tocat a donare cura a is atacantes colombianos Zapata e Muriel e a su tzentrucampista ofensivu islovenu Ilicic. Asa defensa sarda su còmpitu de ddos su frimare.
Seguru ant a serbire a in antis is gol de su capitanu Joao Pedro e Pavoletti.
Attività realizzata col contributo della Regione Sardegna – IMPRENTAS 2020-2021. LR 22/2018, art. 22