Su Casteddu contra su Bologna pro proare a bìnchere in s’istàdiu Dall’Ara
Is sardos ant a giogare foras de domo contra is emilianos: ant arrenèschere torra a bìnchere?
Pro is casteddajos s’aversàriu de sa partida benidora at èssere su Bologna, un’iscuadra chi est fàghende unu campionadu bonu meda.
At èssere una partida istragosa meda pro su Casteddu, pro ite is emilianos sunt giogadores chi gherrant, mancari apant pèrdidu is ùrtimas garas coladas contra Milan e Napoli.
S’atacu de is emilianos est perigulosu meda, cun s’austrìacu Arnautovic chi est unu bonu giogadore. Seguru custu giogadore at a tocare a ddu marcare bene, ma peri a is àteros atacantes comente Barrows e Soriano.
Isperamus chi in custa àtera partida is ruju-blu ant èssere apretados de sa gana de fàghere puntos, pro non ruinare totu s’istajone.
Pro arrenèschere a superare sa crisi a pustis sa partida perdida contra sa Fiorentina – foras de domo – e contra sa Roma – a s’Unipol Domus – , custa chida su Casteddu at a fàghere de totu pro nde essire a a sa lestra.
At a bastare custa voluntade pro fàghere torrare sa gana de bìnchere a is giogadores e pro fàghere bìdere sa balentia issoro a is tifosos casteddajos?
At èssere làstima a nche fuliare custu incumentzu de campionadu e a non sighire a gherrare comente in sa partida contra sa Roma.
Contra su Bologna is ruju-blu no ant a pòdere contare a pitzu de s’atacante Keita Balde, chi no est mancu istadu cunvocadu de Mazzarri, pro ite no istat bene de salude.
Àtera màniga de candela Pavoletti, at a torrare a giocare a su costadu de su capitanu Joao Pedro. Su capitanu est su giogadore chi at a podere fàghere sa diferèntzia pro is casteddajos.
Mihajlovic, allenadore de su Bologna, tenet is pensamentos suos, cun unu o duos giogadores chi sunt mesu infortunados.
S’isperàntzia pro su Casteddu est de torrare a fàghere innamorare is tifosos cun su giogu bellu, ma pro immoe cun s’allenadore Mazzari custu no est galu capitadu.
Sa tzitade de sa turre de is molentes diat èssere su logu mègius pro chi torret a capitare. Amus a bìdere.
Attività realizzata col contributo della Regione Sardegna – IMPRENTAS 2020-2021. LR 22/2018, art. 22