Sa partida contra sa Lazio at fatu pensare chi su Casteddu a s’Unipol Domus diat àere fatu una bella gara contra s’Empoli puru. Imbetzes, nudda de totu custu, e is òmines de Mazzarri ant giogadu un’isfida mala contra is toscanos ghiados dae s’allenadore Andreazzoli.
A pustis de una mesora in ue is iscuadras si sunt istudiadas a pare, s’Empoli est renèssidu a marcare sa rete de su 1-0, cun Di Francesco, fìgiu de s’ex allenadore ruju-blu de su comintzu de s’istajone colada, Eusebio.
S’atacante toscanu est istadu bravu meda a isfrutare su tiru diagonale de su cumpàngiu Haas. Ma s’iscuadra de Andreazzoli at sighidu a fàghere unu giogu bonu e pro mèritu de su portieri Cragno no at fatu àteros gol. Marin ebbia pro su Casteddu at proadu a paregiare in un’ocasione, ma no est resèssidu.
In su segundu tempus, Keita Balde at pitzigadu unu palu pro is casteddajos, ma est s’Empoli chi at agatadu sa segunda rete, gràtzias a Stulac intradu dae pagos minutos in campu.
A pustis de custu gol, su Casteddu est comente chi non ddoe èsseret, e is toscanos ant àpidu duas ocasiones pro marcare su 0-3.
A sa fine de sa partida, is tifosos ruju-blu ant frusciadu is òmines de Mazzari, durante s’essida dae su retàngulu birde.
S’allenadore de is sardos, a is giornalistas chi dd’ant intesu in sala de imprenta, at naradu chi non s’ispetaiat una partida mala comente a custa. At naradu chi is giogadore de s’Empoli ant curtu prus de is suos, e custa cosa a pustis de sa gara bona contra sa Lazio non dda diat àere mai crétida.
Immoe at a tocare chi Mazzarri aprontet bene meda sa partida contra su Napoli de Spalletti chi est primu in classìfica in Sèrie A. Is giogadores diant a dèpere agatare sa gana pro gherrare e giogare bene in s’Istàdiu Armando Maradona de Napoli, pro ite s’arriscu est cussu de pigare paritzas retes.
In prus de s’àteru, a pustis de chimbe partidas dae su cumentzu de su campionadu, sa classìfica de su Casteddu est lègia meda: is sardos sunt in su fundu, cun a coa sa Salernitana ebbia.
Attività realizzata col contributo della Regione Sardegna – IMPRENTAS 2020-2021. LR 22/2018, art. 22