In Rùssia unu gióvanu de degheoto annos at mortu ses persones e nd’at fertu àteras 20. Custu tristu fatu est capitadu in s’Universidade de Perm, in sa regione de is Urales. Sa tzitade est meda importante e s’agatat a 1300 chilòmetros dae sa capitale Mosca.
Su mortore est un’istudiante de sa facultade de lege chi at comintzadu a isparare cun unu fusile in mesu a sa gente.
Pro si poderent sarbare istudiantes e professores si sunt cungiados a crae in is aposentos de s’Universidade e àteros sunt essidos a foras brinchende dae is bentanas.
Dae cussu chi s’ischit, su gióvanu est Timor Bermansurov e no at fatu custu istragu pro motivu de terrorismu, ma pro machìmine.
Est istadu issu etotu a nàrrere in is retzas sotziales de no èssere acapiadu a perunu sótziu terrorista. In unu vìdeu, cun sa cara cuada e fusile in manos, ameletzat de ochìere totu cussos chi diat àere atopadu in caminu. Custu messàgiu, posca, est istadu cantzelladu dae sa rete.
Bermansurov est istadu firmadu dae is guàrdias a pustis de ddu àere fertu in manera grae, e immoe s’agatat in s’ispidale, in terapia intensiva.
Fatos comente a custos nde sunt capitados peri àteros in Rùssia e is ùrtimos annos sunt semper de prus. Unu problema chi, segundu su presidente Vladimir Putin, nd’est lòmpidu dae is Istados Unidos, acanta costumat a nde capitare medas.
Ma forsis sa chistione est peri u’àtera: sa fatzilidade de agatare armas in s’ex Unione Soviètica comente in USA. In custas tràgedias in prus ddoe est unu problema sotziale mannu, cun gióvanos semper prus a largu de sa vida reale.
Sa primu cosa de fàghere pro cussu, est a dare atentzione a chie còmporat un’arma e ddi donant sa litzèntzia de girare armadu.
Ma tzertu, custu no at a bastare, at a serbire un’interventu importante dae su puntu de vista sotziale e culturale.
Attività realizzata col contributo della Regione Sardegna – IMPRENTAS 2020-2021. LR 22/2018, art. 22