Is Talebanos sunt intrados in su palatzu presidentziale de Kabul e postu in s’edifìtziu sa bandera bianca issoro cun s’iscrita niedda.
Ant annuntziadu sa rinàschida de s’Emiradu islàmicu de s’Afganistàn, comente su chi aiant istituidu in is annos ’90 de su sèculu coladu, finas a s’interventu militare de is Istados Unidos e de is alleados suos.
Su palatzu est istadu “cunsignadu” ufitzialmente a is Talebanos, a pustis de sa fua de su presidente Ashraf Ghani, chi at afirmadu de dd’àere fatu pro evitare un’ispainamentu de sàmbene.
A su chi s’ischit non ddoe est istada perun violèntzia durante su passàgiu de cunsignas, una resa paghiosa de is istruturas de su guvernu chi diat èssere in cursu in totu su Paisu.
Epuru custa situatzione de paghe, cuat un’àtera realidade. Semus assistende a una fua generale de is otzidentales chi torrant in is natziones issoro a sa lestra e a sa serrada de totu is ambasciadas, francu cussa russa e tzinesa.
Mìgias de tziviles ant lassadu s’Afganistàn o sunt prontos a ddu lassare, cun persones meda chi a sa disisperada intentant de nche pigare in is aeroplanos in partèntzia o si siddant a is alas durante is manovras de bolu.
A si nde bòlere andare sunt prus che totu is chi in custos annos ant collaboradu cun is fortzas de sa NATO, ma ddoe at timòria peri pro is fèminas chi in custos annos si sunt emantzipadas. Custas arriscant de pèrdere su traballu e torrare a una situatzione de sutamissione, e fintzas de èssere assassinadas.
Custa fua de is Istados Unidos e de is àteras natziones, ammentat sa de is americanos dae Saigon. Sa conchista de Kabul dae banda de is Talebanos at a tènnere unu balore simbòlicu prus mannu de cuddu istratègicu.
S’ocupatzione militare acontèssida a pustis de s’atentadu de su 11 de cabudanni 2001, cuaiat is germes de sa derrota. Su problema chi dae immoe in susu s’at a agatare s’ONU no est fàtzile, ma de seguru no at a pòdere girare is ogros a un’àtera banda: tocat intervènnere a sa lestra o at a èssere una tragèdia umanitària.
Attività realizzata col contributo della Regione Sardegna – IMPRENTAS 2020-2021. LR 22/2018, art. 22