Est mortu in Normandia – Frantza – Gino Strada, méigu e filàntropu. Aiat 73 annos.
A donare sa noa sunt istadas personas a presu de sa famìlia Strada, chi sunfriat dae medas a su coro.
Unu coro mannu a beru, cussu de su mèidu milanesu chi gràtzias a sa Ong Emergency, fundada cun sa pobidda Teresa Sarti – morta in su 2009 – e àteros amigos, in su 1994, at fraigadu ispidales, logos pro su primu sucursu e àteros tzentros ispetzialitzados pro mannos e minores.
In totu, s’òpera de su sótziu umanitària est lòmpida in 18 Paisos e at sarbadu casi 10 milliones de personas in totu su Mundu.
Podimus nàrrere duncas chi custu òmine est istadu unu gigante de su tempu nostru e mancari sa morte sua su chi at lassadu est un’eredu mannu a beru, e semus seguros chi is sòtzios de Emergency e mescamente sa fìgia Cecilia, ant a sighire s’àndala sua.
Seguru at a mancare s’autoridade de su fundadore, pròpiu immoe chi s’Afghànistan est torrada in is manos de is Talebanos, e sunt lòmpende tempos malos pro is tziviles.
Su méigu milanesu est istadu semper contra a sa gherra, pro ite at bidu cun is ogros suos su chi càpitat a sa populatzione e at cumpresu chi no at a serbire mai a nudda. Pro cussu at naradu chi issu non fiat unu patzifista, ma contra a sa gherra.
Is membros de su sótziu umanitàriu in custas dies sunt pensendu a fàghere calicuna cosa pro onorare in unu bellu modu sa memòria de su fundadore issoro, cando su corpus at a èssere rimpatriadu in Itàlia. Difatis gente meda at a bòlere donare de persona, s’ùrtimu saludu a Gino Strada.
Imbetzes in medas tzitades de totu s’Itàlia si sunt movende pro intitulare pratzas e caminos a su méigu milanesu e àteros diant bòlere donare su nùmene suo a manifestatziones famadas.
Una bella cosa de seguru, pro ite ddu meritat a beru, ma semus seguros chi diat at a èssere prus cuntentu a ue s’agatat immoe – isperamus in unu logu prus giustu de custu Mundu – chi is Istados e sa gente non si furrit a s’àtera banda a dae in antis a is cunflitos, comente est capitendu in custas dies cun is fatos de s’Afghànistan.
Attività realizzata col contributo della Regione Sardegna – IMPRENTAS 2020-2021. LR 22/2018, art. 22