Andat a in antis a sa lestra sa vatzinatzione contra su Covid-19 in s’Ìsula, cun su pianu de immunizatzione pro giòvanos tra is 12 e is 16 annos.
Pro pòdere atzèdere a sa vatzinatzione is giòvanos s’ant a dèpere impreende su sistema de is Postas Italianas.
Unu passu importante chi diat pòdere èssere cussu detzisivu pro essire in modu definitivu dae s’apretu Covid-19, bida peri s’essida de sa variante Delta (ex indiana).
In su mentres in Sardigna su 54% de sa populatzione at retzidu sa prima dose de vatzinu de sa populatzione, e belle su 30% at totu su tziclu.
Peristantu in sas dies coladas sunt arribbadas casi 90 mìgia doses noas de su vatzinu Pfizer, chi donat ispera bona pro s’andamentu de sa campagna de immunizatzione de is sardos. Difatis su pianu de vatzinatzione at abrandadu unas cantas bias a càusa de sas problemàticas acapiadas a su vatzinu Astrazeneca, como riservadu a is chi tenent prus de 60 annos
In s’ora unas cantas Regiones si sunt chesciadas pro sa mancàntzia de doses Pfizer, chi diat portare a unu abrandamentu de is suministratziones e duncas at a pònnere in duda s’obietivu de s’80% de s’immunizatzione de sa populatzione intro cabudanni.
Su problema at a èssere su de sas vatzinatziones eteròlogas, est a nàrrere cussas – suta is 60 – chi ant retzidu sa prima dose Astrazeneca, e chi ant a dèvere cumpletare su tziclu cun Pfizer. Duncas ant a serbire prus doses de Pfizer, e is fruniduras noas Astrazeneca s’ant a pòdere impreare pro is prus mannos de 60 annos ebbia.
In custas dies sunt essende a campu is efetos de sa vatzinatzione in s’Ìsula, chi ant poderadu bàscias is cundiduras e is mortes. Seguru in is meses sighentes at a tocare a donare semper cura, sende chi una parte manna de sa populatzione no est istada vatzianda. Pro custu, in s’istade, at a tocare a si donare de fàghere pro aumentare is prenotatziones.
Attività realizzata col contributo della Regione Sardegna – IMPRENTAS 2020-2021. LR 22/2018, art. 22”