In is dies coladas semus andados a Austis pro bìdere su monumentu naturale de sa Crabarissa, sa corona de granitu chi s’agatat in su sartu de custa bidda in provìntzia de Nùgoro, in sa zona numenada Sa Senoredda.
Unu logu ispantosu a beru, in ue s’agatat custa pedra chi paret una fémina a bestire sardu.
Segundu sa paristòria, una bella pitzinna de Crabas si fiat innamorada de unu pastore de Austis, connotu cando fiat caladu a ierrare a su Campidanu de Aristanis. Is duos gióvanos si fiat giurados amore eternu e si fiant iscambiados is donos pro si cojuare.
Acabadu su tempus de sa tràmuda, s’austesu fiat torradu a su monte de bidda sua e sa pitzinna fiat abarrada a dd’isetare, ma pro de badas. A s’orròschida sa crabaresa, oriolada, aiat detzisu de andare a Austis acanta fiat s’innamoradu suo, ma dd’aiat agatadu cojuadu cun un’àtera fèmina.
Fata s’iscoberta mala, sa pitzinna si de fiat torrada a andare in deretura, ma durante su biàgiu pro contoniare a Crabas, a su dispraghere fiat abarrada marmurada, furriendesi in cussa corona de pedra chi s’agatat galu oe in su sartu de Austis.
Ph: Roberto Anedda
Custu contu, chi est lòmpidu finas a nois dae s’antigòriu, tenet unu significu pretzisu: est a non brullare cun s’amore e cun is sentidos.
Cando castiamus su monumentu naturale de sa Crabarissa paret a beru una fémina cun su bestire sardu, cun su mucadore e sa fardeta. Si pensamus a s’istòria paret chi sa Crabarissa siat castiende cara a sa bidda de s’innamoradu, forsis pensende a cando fiant in paris o isperende chi torraret a calare a su Campidanu de Aristanis pro sa tràmuda.
Non dd’amus a ischire mai, però una cosa est segura: custu est unu logu bellu de bisitare. Pro chie non dd’at bidu mai, amus postu calicuna fotografia e unu vìdeu.
Attività realizzata col contributo della Regione Sardegna – IMPRENTAS 2020-2021. LR 22/2018, art. 22”
