Semper prus serente s’intrada in vigore de su Passaportu Birde europeu, ma unos cantos espertos pedint una “valutatzione de impatu” subra de su sistema sanitàriu, subra de s’ecuivalèntzia de is recuisitos pro dd’otènnere – vatzinatzione, tampone e proa de sanamentu -, subra de su sistema de controllu e subra de is deretos de is persones e eventuales disugualidades chi s’ant a creare.
Ddu sutalìniat su The Institute for Technology In The Public Interest, assòtziu internatzionale de ativistas e espertos.
Benit posta s’atentzione subra sa netzessidade de unu suportu infrastruturale e amministrativu chi garantat s’autentitzidade de su tzertificadu tenende contu chi medas sistemas sanitàrios pùblicos in Europa non sunt totu digitales. In prus, agiunghent is espertos, su passaportu sanitàriu at a èssere unu bonu mèdiu de atzessu in is logos, non solu cuddos pùblicos, creende gasi una ” interdipendèntzia tra collaboradores privados, guvernos e pùblicu, chi andat tenta suta controllu” e chi “introduit formas noas de politzia in sa vida de ogna die”.
Si pedint ite siat faghende s’Ue “pro impedire chi su tzertificadu contribuat galu de prus a sistemas ratzistas e classistas, a una sotziedade a prus livellos” e comente “su regulamentu cunsìderat is persones a su de foras de s’Ue e su modu chi is deretos umanos issoro diant pòdere èssere influentzados dae s’introdutzione de is tzertificados digitales”.
Finida sa fase isperimentale pro sa prataforma de su Passaportu Covid europeu, cras,su 1 làmpadas ddoe at a àere su làntziu ufitziale de su gateway Ue, cun is primos Istados membros chi s’ant a collegare.
Tra custos fintzas s’Itàlia, chi però no at a comintzare giai dae in deretura, a diferèntzia pro esèmpiu de sa Grètzia, a emìtere is tzertificados digitales. Su bia ufitziale de su tzertificadu Covid, est a nàrrere cando su tìtulu at a èssere reconnotu e at a comintzare a èssere impreadu in totus is 27 Istados membros, at a èssere comente si siat a pustis de sa fine de su percursu legislativu de s’Ue, overas a s’agabbu de mese de làmpadas.
Attività realizzata col contributo della Regione Sardegna – IMPRENTAS 2020-2021. LR 22/2018, art. 22”