A pustis de tres chida in zona ruja, sa Sardigna est pronta a cambiare colore.
Dae lunis amus a èssere colore de arantzu o grogu? Custu diat bòlere cumprèndere sa gente pro ischire cales ant a èssere is limitatziones de sa zona assignada, pro ite a segundu de sa classificatzione, is efetos pro s’economia isolana, giai dannificada, ant a èssere diversos.
S’ùrtimu faeddu ispetat a su ministru de sa Salude, Roberto Speranza, chi a su chi s’est cumpresu, est puntadu pro insertare sa Regione in zona arantzu.
Is datos de Istitutu Superiore de sa Sanidade sunt bonos meda, cun su Rt a 0,81 – tra is prus bàscios de Itàlia -, e fintzas is postos ocupados in terapia intensiva sunt meda prus pagos, gosi comente is epitzentros de ispàinu de Covid-19.
S’assessore regionale de sa Sanidade, Mario Nieddu est sollitzitende su ministru Speranza de fàghere passare sa Sardigna in zona groga, pro ite àteras duas chidas in custa fàscia diant a èssere graes meda pro is sardos. Forsis, cunsiderados is paràmetros positivos e un’arriscu minore, pro s’ìsula at a bastare una chida ebbia in zona arantzu.
Amus a bìdere, e isperamus chi sa detzisione siat custa pro ite sa gente est chesciosa e est incumintzende a calare in caminu, comente est sutzèdidu oe puru a Nùgoro e a Tortolì, acanta ant protestadu is butegheris.
In su capulogu barbaritzinu is cummertziantes, ant manifestadu cun cartellos e a boghes a suta de sa Prefetura, imbetzes in Ogiastra is butegheris si sunt postos in sa carrera manna de sa bidda in fila, unu fatu a s’àteru, poderende cun is manos un’acàpiu nieddu.
Sa situatzione est grave. Bastat pensare a is tzilleris e a is ristorantes chi podent fàghere servìtziu de asportu o cunsigna a domitzìliu ebbia. Pro custu calicunu at cungiadu s’atividade e is chi sunt poderende s’agatant in dificultade manna.
Ma medas àteras impresas puru sunt istadas postas in ghenugros dae is mesuras cunsighentes a sa pandemia.
Attività realizzata col contributo della Regione Sardegna – IMPRENTAS 2020-2021. LR 22/2018, art. 22”